भांगरभूंय | प्रतिनिधी
भांगरभूंय । प्रतिनिधी
पणजीः लोकसभा वेंचणुकेचे फाटभुंयेर दक्षी गोंय जिल्होधिकाऱ्याच्या कार्यालयांत म्हायती आनी तंत्रज्ञान (आयटी) मॉनिटरींग विभागांत सेवा दिवपी वीज खात्यांतले कनिश्ठ लिपीक नितेश नायक हाणें आयकर (आयटी) अधिकारी आशिल्ल्याचें भासोवन दिल्लीच्यान आयिल्ल्या दोगां वेवसायिकांचे 16 लाख रुपया हडप केल्ल्याचो प्रकार मुखार आयला. ह्या प्रकरणांत वेर्णें पुलिसांनी गुन्यांव दाखल करून नितेश नायक हाचे सयत दाबोळी घोळट्या पंगडाचो अधिकारी अनिरुद्ध पवार हाका बुधवारा राती अटक केली. ह्या प्रकरणांत आनीक दोगांचेर कारवाय जातली.
मजगतीं, दक्षीण गोंय जिल्होधिकाऱ्यान वयल्या दोगा अधिकाऱ्यांक निलंबीत केल्यात. ह्या प्रकरणांत करंझाळे रावपी वेवसायीक अशोक चौधरी हाँणी कागाळ दाखल केल्या. ते प्रमाण, चौधरी आनी ताचो सांगाती पवनकुमार वर्मा 31 मार्च 2024 ह्या दिसा सांजे वेळार गोंयांत आयिल्ले. येतना ते 16 लाख रुपया घेवन आयिल्ले. मजगतीं, नितेश नायक हाका इश्ट चंदन हाचे कडल्यान कोणतरी व्हड प्रमाणार रकम घेवन मोटारीन भायर सरिल्ल्याची म्हायती मेळिल्ली. ते प्रमाण नितेश नायक हाणें आपल्या इश्टाक आनी आपल्या चुलत भावाक आपोवन घेतलो आनी दाबोळी विमानतळाचेर पावले. ते उपरांत 31 मार्चाक रातच्या 8 वरांच्या सुमाराक दाबोळी मतदारसंघांतल्या वेल्स जंक्शनार नितेश नायक हाणें आपूण आयकर मॉनिटरींग विभागाचो अधिकारी आशिल्ल्याचें भासोवन अशोक चौधरी आनी ताचो सांगाती पवनकुमार वर्मा हांची गाडी आडायली. ते उपरांत वास्को पुलीस स्टेशना मुखार व्हरून संबंदीत रकम हडप केल्ल्याचें कागाळेंत म्हणलें.
हाची दखल घेवन वेर्णें पुलीस निरिक्षक मेल्सन कुलासो हांणी नितेस नायक हाचे सयत दाबोली घोळट्या पंगडाचो अधिकारी अनिरुद्ध पवार आनी हेरां आड भादंसंच्या कलम 419 आनी 384 खाला गुन्यांव दाखल करून बुधवारा राती अटक केली. ह्या प्रकरणांत पुलिसांनी आनीक दोगांक ताब्यांत घेतल्यात आनी तांची चवकशी सुरू केल्या.
नितेश नायक हो वीज खात्याचो कनिश्ठ लिपीक आसा, जाल्यार अनिरुद्ध पवार हो मुरगांव पालिकेचो अभियंतो आसा. त्या दोगांक वेंचणुकेचे फाटभुंयेर दाबोळीच्या आयटी विभागांत नियुक्त केल्ले. वयल्या प्रकरणांत ह्या दोगांची चवकशी करून दक्षीण गोंय जिल्होधिकारी अश्वीन चंद्री (आयएएस) हांणी निलंबीत केल्यात.
सविस्तर म्हायती प्रमाण, दक्षीण गोंयच्या पुलीस अधिक्षकाक उत्तर गोंयच्या पुलीस अधिक्षका कडल्यान 31 मार्चाचे राती वेळार म्हत्वाची म्हायती मेळिल्ली. ही म्हायती दाबोळीच्या घोळट्या पंगडाक दिल्ली. 2 एप्रीलाक दक्षीण गोंयच्या पुलीस अधिक्षकाक हे घडणुके संबंदांत आयकर विभागान कॉल केलो. ते घडणुकेंत जप्ती जाल्ल्या पयशांची स्थिती कितें आसा, हाची चवकशी करपाचें निर्देश दिल्ले. ते प्रमाण पुलीस अधिक्षकान पुराय घडणुकेची म्हायती दक्षीण गोंयचे जिल्हो दंडाधिकारी आनी वेंचणूक अधिकारी हांकां दिली. जिल्होधिकाऱ्यान दक्षीण गोंयचे पुलीस अधिक्षक आनी संबंदीत अधिकाऱ्यांची बसका घेतली. मात, पयशे मेळूंक नात. ह्याच प्रकरणांत अशोक चौधरी आनी पवनकुमार वर्मा हांणी दाबोळीच्या घोळट्या पंगडांतल्या दोगांनी 16 लाख रुपया घेतिल्ल्याची म्हायती वास्को पुलिशेक दिल्ली. दक्षीण गोंय अधिक्षकान ताकतिकेन ह्या प्रकरणाचो तपास करचे खातीर दाबोळी विमानतळ आनी वास्को पुलीस निरिक्षकांक सुचोवणी केली. पुलीस निरिक्षकान चवकशी केली तेन्ना ह्या प्रकरणाचो तपास दाबोली मतदारसंघाच्या वेंचणूक घोळट्या पंगडान केल्ल्याचें कळ्ळें. ते प्रमाण 31 मार्चाक रातचे ड्युटेर आशिल्ल्या पंगडांतल्या वांगड्या सयत पुलीस अधिकाऱ्यांची चवकशी केली. वेंचणुकेंतले अर्थीक गैरप्रकार आडावपा खातीर म्हायती तंत्रज्ञान मॉनिटरींग पंगडांत तैनात आशिल्लो नितेश नायक हांणी ही रकम जप्त केल्ल्याचो मुळावो दुबाव आयलो.
नितेश हाची चवकशी केली तेन्ना ताका ताचो इश्ट चंदन हाचे कडल्यान कोणेतरी व्हड प्रमाणांत रकम घेवन मोटारीन गेल्ल्याची म्हायती मेळिल्ली. ते म्हायतीच्या आदारान 31 मार्चाक रातच्या 8 वरांच्या सुमाराक दाबोळी मतदारसंघांतल्या वेल्स जंक्शनार ताणें गाडी डायली आनी वास्को पुलीस स्टेशना मुखार व्हेली. मात कसलीच रकम मेळूंक ना, अशें सागलें. उपरांत ताणें आरथ्यो- परत्यो जापो दिल्यो. ताचे वयल्यान तो फट उलयता अशें दिसलें. वास्को पुलीस स्टेशनाचे पीएसआय रोहन नागेशकार आनी हेडकॉन्स्टेबल संतोष भाटकार हांणी ताचेर केल्ले कारवायेची म्हायती दिली. नितेश नायक तेन्ना एके मोटारींत सांपडलो. रातच्या 10 वरांचेर ताका जेन्ना धरलो तेन्ना ताणें वास्को पुलीस स्टेशना भायर कागाळदार अशोक चौधरी आनी पवनकुमार वर्मा हाचे कडेन एक बॅग दिली. सुरवेक बॅगेंत सोरो आशिल्ल्याचो दावो नितेशान केल्लो. उपरांत तोवूय ताणें बदल्लो. तेच राती अनिरुद्ध पवार हाणें नितेशाक आपयिल्लो, पूण अनुरुद्ध हाणें तो दावो भायर मारिल्लो. जेन्ना वास्को पुलीस स्टेशना भायले सीसीटीव्हीची फुटेड पळयली तेन्ना अनिरुद्ध आनी नितेश मेळिल्ले हें स्पश्ट जालें. हो सगळो गोलमाल आशिल्ल्याचें लक्षांत आयले उपरांत जिल्होधिकाऱ्यान दोगांकूय अटक केली. तशेंच तांचे विशीं फौजदारी प्रक्रिया सुरू करचे खातीर 48 वरां भितर सविस्तर अहवाल सादर करपाचो आदेश दिलो. जर ही रकम सांपडली जाल्यार दोगांकूय ख्यास्त जावपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
