भांगरभूंय | प्रतिनिधी
नासीर काजू फार्माचो धनी ताब्यांत, घरांचें लुकसाण
भांगरभूंय । प्रतिनिधी
पणजीः अन्सोळें वाळपयच्या नासीर काजू फार्मांत सोमारा रातीं जाल्ल्या जिलेटीन स्फोटान पुराय वाठार हाल्लो. स्फोटाक लागून एक किलोमिटराच्या वाठारांतल्या घरांच्यो वण्टी, जनेलांचे हारशे, पाख्यांचें व्हड प्रमाणार लुकसाण जालें. ह्या प्रकरणांत वाळपय पुलिसांनी नासीर हुसेन जमादार हाका रातीं उसरां ताब्यांत घेवन चवकशी सुरू केल्या.
वाळपय पुलिसांनी दिल्ले म्हायती प्रमाण रातच्या 10 वरांच्या सुमाराक अन्सोळे स्फोटाचो आवाज जाल्ल्याची म्हायती मेळ्ळी. तातूंत वाठारांतल्या घरांच्यो वण्टी, जनेलांचे हारशे, पाख्यांचें लुकसाण जाल्ल्याची म्हायती मेळ्ळी. ते प्रमाण, पुलीस निरिक्षक राहूल नायक भंडारी हांच्या मार्गदर्शना खाला उपनिरिक्षक अल्लाहुद्दीन खान आनी हेर पुलीस घडणुकेचे सुवातेर गेले. ह्या वेळार नासीर काजू फार्माचे एके कुडींत स्फोट जाल्ल्याचें मुखार आयलें.
ते प्रमाण पुलिसांनी फार्माचो धनी नासीर हुसेन जमादार हाका ताब्यांत घेवन ताची मुळावी चवकशी केली, त्या वेळार तो दोंगर फोडपाचें काम करता अशें कळ्ळें. ताणें ह्या कामा खातीर तीन म्हयन्यां आदीं जिलेटीन हाडिल्लें. मजगतीं काम बंद आशिल्ल्यान ताणें ते कुडींत जिलेटीन सांठोवन दवरिल्लें. ते खातीर गरजेची उपाय येवजण केल्ल्याची म्हायती दिली.
मजगतीं, सोमारा रातच्या 10 वरांच्या सुमाराक स्फोट जालो. ह्या प्रकरणांत पुलीस ताका ताब्यांत घेवन ताची अदीक चवकशी करतले. मजगतीं, पुलिसांनी फुडलो तपास करचे खातीर मंगळारा सकाळीं फॉरेन्सीक पंगडाक आपयिल्ल्याची म्हायती मेळ्ळ्या. हे घडणुकेंत कसलीच जिवीतहानी जावंक ना, मात एक किलोमिटर वाठारांत स्फोटाचो आवाज पातळिल्लो. तशेंच वाठारांतल्या खूबश्या घरांच्यो वण्टी, जनेलांचे हारशे आनी घराच्या पाख्यांचें व्हड प्रमाणार लुकसाण जालां. मजगतीं, वाळपय पुलिसांनी प्रथमदर्शनी अपघाताचो गुन्यांव नोंद करून चवकशी सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
