भांगरभूंय | प्रतिनिधी
लोकांमदीं घुस्पागोंदळ; राष्ट्रीय सुरक्षा दळान केली पळोवणी
भांगरभूंय । प्रतिनिधी
वाळपयः सोमारा भिरोंडें पंचायतींतल्या अन्सोळें वाठारांत जाल्लो स्फोट हो जिलेटीनाचो आशिल्लो काय बॉम्बाचो हे संबंदांत घुस्पागोंदळ निर्माण जाला. कारण बुधवारा दीसभर राष्ट्रीय सुरक्षा दळाच्या बॉम्बस्फोट निकामी करपी पंगडान त्या वाठारांत भोंवून मातयेचे आनी हेर सामानांचे नमुने एकठांय केले. ताका लागून त्या स्फोटा संबंदांत वेगवेगळे तर्कवितर्क उक्तायतात. मजगतीं, वाळपय पुलीस निरिक्षक राहूल नायक हे वरिश्ठ अधिकाऱ्यांच्या मार्गदर्शना खाला ह्या प्रकरणांत अटक केल्लो दुबावीत आरोपी नासीर हुसेन जमादार हाची वेगवेगळ्या पांवड्यार चवकशी करतात, अशी म्हायती मेळ्ळ्या.
बुधवारा सकाळीं राष्ट्रीय सुरक्षा दळाच्या बॉम्ब निकामी करपी पंगडाच्या वट्ट 12 जाणांच्या पंगडान ते सुवातेर भेट दिली. हे संबंदांची म्हायती मेळटाच थळाव्या लोकांनी थंय गर्दी केली, पूण पुलिसांनी स्फोट जाल्लो वाठार सील केला.
मेळिल्ले म्हायती प्रमाण आतां मेरेन 15 घरांचें लुकसाण जाल्ल्याचो अदमास आसा. हं संबंदांत लुकसाणेचो अहवाल तयार करपाचें काम सुरू जालां. सर्वेक्षणाचें काम पुराय जाले उपरांत हे संबंदांतलो अहवाल सरकाराक सादर करतले, अशी म्हायती संबंदीत खात्याच्या सुत्रांनी दिली.
सोमारा सांजेच्या 7.50 वरांच्या सुमाराक जाल्ल्या व्हड स्फोटाक लागून खूबश्या घरांचें लुकसाण जालां. खूबश्या घरांच्यो वणटी दुबळ्यो जाल्यात. हे खातीर त्या घरांनी रावप धोक्याचें जालां. ह्या प्रकरणांतलो दुबावीत आरोपी नासीर हुसेन जमादार हाका खंयचेच स्थितींत माफ करचो न्हय. ताका लागून खूबश्या घरांचें लुकसाण जालांच, ते भायर सैमाचेंय व्हड प्रमाणार लुकसाण जालां. हे खातीर दुबाविताचेर खर कारवाय करची, अशी थळाव्या लोकांनी मागणी केल्या. मजगतीं, दुबाविताक वाळपय प्रथम न्याय जिल्होधिकाऱ्यान पांच दिसांची पुलीस कोठडी दिल्या.
मजगतीं, दुबावीत नासीर जमादार हाची फाटभूंय तपासतात. कांय वर्सां आदीं जमादार हाका विदेशांतल्यान येतना विमानतळार ताब्यांत घेतिल्लो, हे संबंदांतूय वाळपय पुलीस अदीक तपास करतात, अशी म्हायती मेळ्ळ्या. जे सुवातेर स्फोट जाल्लो थंय पुरून दवरिल्लें जिलेटीन इतल्या व्हड प्रमाणांत कित्या खातीर हाडिल्लें, हाचोय पुलीस तपास करतात. दुबाविता कडल्यान खूब जाणांचीं नांवां उक्तीं जाल्यांत. ताका लागून येता त्या काळांत संबंदितांक नोटीस धाडून चवकशे खातीर आपयतले, अशेंय पुलीस सुत्रां कडल्यान कळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
