भांगरभूंय | प्रतिनिधी
ऑनलायन पर्यावरण डेटा मॉनिटरिंग कूड आनी तंत्रज्ञान म्हायती केंद्राचें जालें उक्तावण
पणजी, प्रतिनिधी: जर आमी आमच्या उत्पादनांतल्यान चडांत चड प्लास्टिकाचो पुनर्वापर करपाचे दिकेन काम केलें जाल्यार गोंय हें हेर देशां खातीर आदर्श थारपाक शकता. गिरायकांक आपल्या जबाबदारीची जाणीव करून दिवपाच्या उद्देशान विधानसभा अधिवेशनांत डेपोजीट रिफंडेबल येवजणेक मान्यताय दिल्ल्याचें पर्यावरण मंत्री निलेश काब्राल हांणी सांगलें.
मंत्री काब्राल हांणी आयज साळगांवां गोंय राज्य प्रदूशण नियंत्रण मंडळान आयोजीत कार्यावळींत ऑनलायन पर्यावरण डेटा मॉनिटरिंग रूम आनी तंत्रज्ञान म्हायती केंद्राचें उक्तावण केलें.
गोदरेज कंज्युमर प्रॉडक्ट्स लिमिटेड कंपनीन गोंय प्रदूशण नियंत्रण मंडळ, मिनरल फावंडेशन ऑफ गोंय आनी पुराय (ई) अर्थ एन्व्हायर्नमेंट सोल्युशन्स हांच्या सहकार्यान सिम्पलीफायींग पोस्ट कंज्युमर रिसायक्लेट्स: आव्हानां आनी संदी ह्या विशयाचेर आयोजीत परिशदेचेंय उक्तावण केलें.
गोंय कोयर वेवस्थापन कार्यावळीचो भाग जाल्ले खातीर गोदरेज कंज्युमर प्रॉडक्ट्स प्रा. लिमिटेडचे उपकार तांणी मानले.
गोदरेज इंडस्ट्रीज लिमिटेड आनी असोसिएट कंपन्यांच्यो सीएसआर गायत्री दिवेचा, गोंय राज्य प्रदूशण नियंत्रण मंडळाचे अध्यक्ष महेश पाटील, पर्यावरण खात्याचे सचीव अरुणकुमार मिश्रा आनी केंद्रीय प्रदूशण नियंत्रण मंडळाचे वांगडी सचीव डॉ. प्रशांत गारगव हांचेंय ह्या वेळार उलवप जालें.
ह्या वेळार एकात्मीक कोयर वेवस्थापन कार्यावळी खातीर गोंय राज्य प्रदूशण नियंत्रण मंडळ, गोंय कोयर वेवस्थापन महामंडळ, गोदरेज कंज्युमर प्रोडक्ट्स लिमिटेड, पुराय (ई)अर्थ एन्व्हायर्नमेंट सोल्युशन्स आनी मिनरल फावंडेशन ऑफ गोवा हांचेमदीं समजीकाय कबलात जाली. ह्या कबलाती प्रमाण दिवचल आनी सत्तरी म्हालांतल्यो ३ नगरपालिको आनी ३० पंचायत क्षेत्रांतलो शंभर टक्के कोयर एकठाय करप आनी ८० टक्के कोयराचें विलगीकरण करपाचे उद्दीश्ट आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
