भांगरभूंय | प्रतिनिधी
पणजी : म्हापशें, दिवचले आनी फोंडें पुलिसांनी सोशल मीडियाचेर आक्षेपार्ह टिप्पणी करून धर्मीक भावना दुखवल्ल्याच्या आरोपा वयल्यान तिगां आड लुकआवट नोटीस जारी केल्या.
पुलिसांचे म्हायती प्रमाण; बॅबेट, चॅल्सेआ आनी मास्कारेन्हस (तांची पुराय नांवां आजून मुखार येवंक ना) हांणी एका सोशल मिडिया पोस्टाचेर वादग्रस्त टिप्पणी केल्ल्याचें मुखार आयलें. ह्या प्रकरणांत गुन्यांव दाखल केला. संबंदीत आरोपी आजूनय फरारी आसात. तांचो सोद पुलीस घेतात.
तिनाय पुलीस स्टेशनांनी समन्वयान कारवाय करीत आरोपींक सोदपा खातीर लुकआवट नोटीस जारी केल्या. तशेंच नागरिकांक कसलीय म्हायती मेळ्ळ्यार बेगोबेग पुलिसांक कळोवचें असो उलो मारलो.
मजगतीं, ह्या प्रकरणाचो अदीक तपास सुरू आसा. पेगीनूच आरोपींक अटक करतले, असो विस्वास पुलिसांनी उक्त्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
