भांगरभूंय | प्रतिनिधी
अॅड. प्रभुगांवकार : सोसायटी कर्मचार्यांचें धरणें आंदोलन
भांगरभूंय | प्रतिनिधी
पणजी : पीडब्ल्यूडी कामगार पुरवण सोसायटीचे कर्मचारी फाटल्या कितल्याशाच वर्सां सावन कंत्राटी वा तात्पुरत्या स्वरुपाचें काम करतात. ह्या कर्मचार्यांक कायम करचे, तशेंच ही प्रक्रिया पुराय जाय मेरेन तांकां नियमीत कर्मचार्यां प्रमाण रजा, वेतन दिवप गरजेचें. आमची मागणी पुराय जालींना जाल्ल्या टप्प्याटप्प्यान आंदोलन आनीक खर करतले अशी शिटकावणी अॅड. अजय प्रभुगांवकार हांणी दिल्या. शुक्रारा आझाद मैदानार तांणी माध्यमां कडेन संवाद केलो. ताचे पयलीं गोंयभरांतल्या सोसायटी कर्मचार्यांनी धरणें आंदोलन केलें.
अॅड. प्रभुगांवकार हांणी सांगलें, सोसायटीच्या कर्मचार्यांक 2003 सावन कायम करपाचें फटीचें आस्वासन दितात. मात आयज 23 वर्सां जालीं तरी हीं आस्वासनां पुराय जावंक नात. सध्या ह्या कर्मचार्यांक कायम करप ना अशें कारस्थान चालू आसा. हाचे आड सरकाराक जाप विचारपा खातीर आयज आमी एकठांय आयल्यात. सोसायटीचे कर्मचारी नेमान आशिल्ल्या कर्मचार्यां भशेनूच बिलींग, डेटा एन्ट्री वा एमटीएसचीं कामां करतात. मात तांकां कायम आसपी कर्मचार्यांचे तुळेंत उणें वेतन दितात. हाचे पयलीं कर्मचार्यांक दीसवड्या प्रमाण वेतन दिताले. पांच वर्सां पयलीं आमी आंदोलन केले उपरांत कांय जाणांक तात्पुरतो दर्जो दिलो. 2003 उपरांत पीडब्ल्यूडी मंत्री आशिल्ल्यांनी फकत आपल्या मतदारसंघांतल्या कर्मचार्यांक कायम केले. हेर कर्मचार्यांची जापसालदारी घेवपाक कोणूच तयार ना. हालींच सर्वोच्च न्यायालयान दिल्ल्या ह्या निर्णयाच्या आदाराचेर गोंयच्या ह्या कर्मचार्यांक कायम करप शक्य आसा. मात हे खातीर राजकी इत्साशक्तींची गरज आशिल्ल्याचें अॅड. प्रभुगांवकार हांणी सांगलें.
‘कारणा बगर त्रास दिवचे न्हय’
आमी आंदोलन सुरू केल्ल्यान कांय कर्मचार्यांक खात्यांतले अभियंते त्रास दितात. कर्मचार्यांक मुद्दम लक्ष्य करतात. न्याय मागपा खातीर आंदोलन करप हो आमचो हक्क आशिल्ल्यान कर्मचार्यांक कारणा बगर त्रास दिवप बंद करपाक जाय, अशें अॅड. प्रभुगांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
