भांगरभूंय | प्रतिनिधी
वास्को : वास्कोचे एके भौशीक कार्यावळींत सेंट फ्रान्सिस झेवियर हांचेविशीं आक्षेपार्ह वक्तव्य केल्ल्याचो आरोप आशिल्ले गौतम खट्टराक निमाणें वास्को पयलो वर्ग न्यायालयान सशर्त जामीन मंजूर केला.
खट्टर हांच्या जामीन अर्जावेलो निकाल आयज सकाळच्या सत्रांत अपेक्षीत आशिल्लो. मात न्यायालयान तो राखून दवरून दनपरां २:३० वरांचेर जाहीर करतले अशें स्पश्ट केल्लें. सकाळ सावनूच न्यायालय वाठारांत बरीच गर्दी पळोवपाक मेळ्ळी. निमाणो दनपरां २:३० वरांचेर न्यायालयान आपलो निर्णय जाहीर करीत गौतम खट्टराक जामीन मंजुर केलो.
मजगतीं, गौतम खट्टरा वतीन अँड. अमेय प्रभुदेसाय हांणी न्यायालयांत बाजू मांडली. मजगतीं खट्टर भलायकेचे समस्येक लागून बांबोळेच्या गोंय वैजकी महाविद्यालयाच्या हॉस्पिटलांत उपचार घेताले. भलायकी अस्वस्थ आशिल्ल्यान तांकां न्यायालयांत हाजीर करपाक मेळ्ळें ना. हाका लागून तांची न्यायालयीन प्रक्रिया व्हिडिओ कॉन्फरन्सिंग वरवीं हॉस्पिटलांतल्यान जाली.
वास्कोचे एके कार्यावळी मजगतीं खट्टर हांणी सेंट फ्रान्सिस झेवियर हांचे विशीं आक्षेपार्ह विधान केल्लें, हाका लागून राज्यभर बोवाळ जालो. ह्या विधानाक लागून धर्मीक भावना दुखवल्ल्याचो आरोप दवरून तांचेर गुन्यांव दाखल केल्लो. न्यायालयान तांकां जामीन मंजूर करतना १५ हजार रुपयांची हमी आनी हेर कांय अटी घातिल्ल्यो.
ह्या निकालाक लागून सध्या बोवाळ कमी जाल्लो आसलो तरी गुन्यांव फांट्याचे फुडले चवकशे कडेन सगल्यांचें लक्ष आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
