भांगरभूंय | प्रतिनिधी
मडगांव : कुंकळ्ळे उद्देगीक वसणुकेंत फाटल्या कितल्याशाच वर्सां सावन पडून आशिल्ल्या घातक कोयराचो प्रस्न निमाणो सुटपाच्या मार्गार आसा. थळाव्या नागरिकांचो बरोच काळ चलपी लढो आनी सेगीत केल्ले फाटपुरवणेक लागून, सरकारान हांगचो ५० हजार मेट्रिक टन घातकी कोयर काडपाच्या कामाक सुरवात केल्या. आमदार युरी आलेमाव, थळावे नगरसेवक आनी आंदोलकांचे हाजेरींत हे मोहिमेचें उक्तावण जालें.
हांगचो कोयर शास्त्रोक्त पद्धतीन काडटले, ह्या वाठारांतलें वाडपी प्रदुशण आडावपा खातीर हें एक म्हत्वाचें पावल मानतात. पावस लागीं पाविल्ल्यान प्रशासनान हें काम दोन टप्प्यांत करपाचें नियोजन केलां. पयल्या टप्प्यांत पावस सुरू जाय मेरेन चडांत चड कोयर उखलतले. पावसांत सुरक्षेच्या कारणाक लागून काम बंद दवरतले. पावस सोंपलें उपरांत दुसर्या टप्प्यांत उरिल्ल्या कोयराचो विलो लायतले.
कुंकळ्ळेचे जनतेचे भलायके कडेन खेळपी ह्या घातकी कोयरा आड थळाव्यांनी खुबशीं आंदोलनां केल्लीं. ह्या कामाचे सुरवातेक लागून आंदोलकां मदीं समाधानाचें वातावरण आसा. हें जैत फकत आमचें न्हय सगल्या कुंकळ्ळीकारांच्या एकवटाचो परिणाम आसा. लोकांची भलायकी आनी जीण वाटोवप हेंच आमचें मुखेल ध्येय, अश्यो भावनां ह्या वेळार आंदोलकांनी उक्तायल्यो.
जरी ५० हजार टन घातकी कोयर काडपाक सुरू जालां तरी कुंकळ्ळेंचो प्रदुशणाचो प्रस्न पुरायेन निकालांत येवंक ना, अशेंय थळाव्यांनी स्पश्ट केलें. कोयर काडपाचें काम फकत सुरवात आशिल्ल्यान, ह्या वाठारांत घाण पातळपी फिश मील प्रकल्प आनी हेर प्रदूशण करपी कारखान्यां आड आमची ह्यान फुडेंय आवाज काडटले, असो उलो थळाव्यांनी मारला. हे मोडिमेक लागून कुंकळ्ळे वाठारांतल्या हवा आनी उदक दुशीत जावपाचें प्रमाण उणें जातलें, अशी अपेक्षा उक्तायता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
