भांगरभूंय | प्रतिनिधी
कुडचडें: कुडचडच्या पोरण्या नगरपालिका इमारतीच्या कोणशाक काडिल्ल्या चित्राक एका समाजीक कार्यकर्त्यान आक्षेप घेतला. तांणी मुख्याधिकार्यांकडेन कागाळ केल्या. हाचे उपरांत भौशीक पांवड्यार चर्चा जावपाक लागल्या आनी विवीध प्रतिक्रीया येवपाक लागल्यात.
हे विशीं मेळिल्ले म्हायती प्रमाण कलाकार जोशेल डांटस हांणी जनजागृती उपक्रमाचो भाग म्हणून चित्र काडलां. शेनवारा माध्यमां कडेन उलयतना तांणी स्पश्ट केलें, हें चित्र कुडचडे-काकोडा नगरपालिके कडल्यान योग्य परवानगी घेवन काडलां. तशेंच ह्या उपक्रमाक थळावे आमदार निलेश काब्राल हांचे समर्थन आसा. हें काम तांणी स्वताच्या खर्चान पुराय केलां.
नगरपालिके वतीन दिल्ल्या अधिकृत पत्रांत नमूद केलां; जोशेल डांटस हांच्या पोरण्या कुडचडें-काकोडा नगरपालिकेच्या इमारती भायले वणटीर जनजागृती खातीर वणटीर चित्र काडपाक परवानगीसाठी पत्र मेळ्ळां.
मजगतीं, कुडचडें मार्केटाचे अध्यक्ष रोश परेरा हांणीय ह्या विशयाचेर प्रतिक्रिया केली. तांणी ह्या उपक्रमाक येवकार दिलो. ह्या वाठाराचें सुशोभीकरण आनी नितळसाणे खातीर हो एक सकारात्मक यत्न आशिल्ल्याचें तांणी सांगलें. बाजार वाठार नितळ आनी आकर्शक दवरप हें प्राधान्य आशिल्ल्याचें तांणी नमूद केलें. असल्या उपक्रमांक लागून अदीक पर्यटक आकर्शीत जावपाक शकतात अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
