केरळांत सोरोप चाविल्ल्यान ६ जाणांक मरण
भांगरभूंय | प्रतिनिधी
तिरुवनंतपुरम: केरळ राज्यांत फाटल्या एका सप्तकांत सोरपान चावून ६ जाणांक मरण आयलां. ह्या राज्यांत वाडपी तापमानाक लागून सोरपांचो उपद्रव वाडला. हाका लागून जनते मदीं भंयाचें वातावरण निर्माण जालां.
१९ एप्रिला त्रिशूर हांगा एकाच घरांतल्या दोन भावांक काणेर सोरोप चावलो. हातूंत धाकट्या भावाक मरण आयलें. जाल्यार व्डलो भाव सध्या हॉस्पिटलांत उपचार घेता. तशेंच, कोझिकोड जिल्ह्यांतल्या कुट्टियाडी हांगा एका घरांत एकाच वांगडा ५ विखारी सोरोप सांपडले. हे सोरोप भुरगीं न्हिदिल्ले कुडींतूय पाविल्ले. मात भुरग्यांक कांय जावंक ना.
सोरपा पसून वाचप कशें?
- घराचीं दारां- जनेलां बंद दवरचीं आनी सोरोप भितर सरपा सारकिल्ले बुराक आसल्यार ते बंद करचे.
- भायर उक्तडार वा जमनीर न्हिदप टाळचें. न्हिदपा खातीर खाटीचो वापर करचो.
- घराभोंवतणचो वाठार नितळ दवरचो; कोयर, लाकडां, चुडटां आनी न्हाणी घरां नितळ दवरचीं. थंय कितेंच सांठोवन दवरचें न्हय.
- घराभोंवतणचे बुराक बंद करचे.
- रातच्या वेळार घरा भितर आनी भायर उजवाडाची वेवस्था आसची. भायर वतना टॉर्च वांगडा दवरची.
- पांयांत जोतीं वा बुटांचो वापर करचो.
- वापरपाचे कपडे, बुट, पिशव्यो वा गाडयो वापरपा पयलीं नीट तपासून घेवच्यो.
सोरोप चावल्यार कितें करचें?
- घांस मारिल्ल्या मनशाक भेश्टोवं नाकात, ताका शांत दवरचो.
- ज्या भागाक सोरोप चावला, त्या भागाची हालचाल बंद करची.
- चाविल्ल्या मनशाक धांवपाक वा चलपाक दिवं नाकात.
- घांस मारिल्ल्या घाव्याचेर कितेंच घट्ट बांदूं नाकात.
- ताका रोखडेंच लागींच्या सरकारी हॉस्पिटलांत व्हरचें.
- सोरपाक धरपाचो वा मारपाचो यत्न करून वेळ फुकट घालोवं नाकात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
