भांगरभूंय | प्रतिनिधी
ग्रामस्थांनी घेतली पुलिसांची भेट
फोंडें, प्रतीनिधी : म्हाड्डोळ पुलीस स्टेशनाचे हद्दींत एके अल्पवयीन विद्यार्थीनीचो विनयभंग केल्ल्या प्रकरणांत पुलिसांनी हायस्कूल वेवस्थापनाची चवकशी करपाची मागणी आयतारा ग्रामस्थांनी केल्या. आयतारा सकाळीं सुमार 30 ग्रामस्थांनी पुलीस स्टेशनाचेर वचून निरीक्षक मोहन गावडे हांचे कडेन चर्चा केली. ह्या वेळार जोड मामलेदार राजेश सांखळकार हाजीर आशिल्ले.
कांय दिसां पयलीं एका शरिरीक शिक्षकान विद्यार्थिनीचो विभायभंग केल्ल्याचो गुन्यांव पुलीस स्टेशनाचेर नोंद जाल्लो. पुलिसांनी आजूनय दुबाविताक अटक करूंक ना. ताका लागून आयतारा ग्रामस्थांनी निरीक्षक मोहन गावडे हांची भेट घेवन चर्चा केली. ग्रामस्थांच्या शिश्टमंडळान चर्चा करतना शरिरीक शिक्षकां सयत हायस्कुलाच्या वेवस्थापनाची चवकशी करपाची मागणी केली.
ह्या प्रकरणाची चड म्हायती दितना राजेश नायक हांणी दुबावीत शरिरीक शिक्षकां आड वेवस्थापन मंडळा कडेन आनीक कागाळी दिल्ल्यो. हायस्कुलाचें नांव इबाडपाची शक्यताय आशिल्ल्यान वेवस्थापन मंडळान हीं सगळीं प्रकरणां पुलीस स्टेशना मेरेन व्हरूंक ना. ताका लागून वेवस्थापन मंडळाची खोलायेन चवकशी जावपाची गरज आशिल्ल्याचें तांणी सांगलें.
मजगतीं, अल्पवयीन विद्यार्थ्यांनी पुलीस स्टेशनार कागाळ दिल्या उपरांत शरिरीक शिक्षक, मुख्याध्यापक आनी एका शिक्षकान अटक पुर्व जामीन्या खातीर अर्ज केला. अटक पूर्व जामीन्याचेर बेगीनूच सुनावणी घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
