भांगरभूंय | प्रतिनिधी
न्युमोनिया हो फुफ्फुसांचो धोक्याचो रोग. हातूंत दर वर्सा लाखांनी लोकांक मरण येता. हो रोग फुफ्फुसांतल्या संसर्गाक लागून जाता. धोक्याचे बॅक्टेरिया उस्वासांतल्यान पुलमांवांत पावतात आनी ताका लागून न्युमोनिया जाता. ह्या रोगांत फुफ्फुस दुबळे जावंक लागतात आनी स्वास घेवपाक कठीण जाता. वेळार उपचार केलो ना जाल्यार दुयेंतीक मरण येवपाचो धोको आसता. न्युमोनियाचे जंतू हवेंतल्यान पुलमांवांत भितर सरतात, पूण उदकाक लागूनय न्युमोनिया जावंक शकता हें तुमकां खबर आसा? हालींच्या काळांत पोलंडांत पिवपाच्या उदकाक लागून लोकांक न्युमोनिया जावन मरण येवपाचे दुयेंती सांपडल्यात.
पोलंडाच्या कांय वाठारांनी उदका पुरवणेंत लेजिओनेला बॅक्टेरिया सांपडल्या. हें उदक पियेवन ही बॅक्टेरिया मनशाच्या आंगांत भितर सरतात. हाका लागून लेजिओनरी रोग जालो. ह्या रोगाक लागून न्युमोनिया जाता. पोलंडांत आतां मेरेन शंबरां परस चड लोकांक ह्या दुयेंसाची लागवण जाल्या.
‘द सन’चे खबरे म्हणण्या प्रमाण युरोपीय सेंटर फॉर डिसीज कंट्रोलान लिजिओनेर्स दुयेंसा संबंदी अलर्ट जारी केला. आतां मेरेन ११३ दुयेंतींक लेजिओनेला बॅक्टेरिया आशिल्ल्याचें ह्या केंद्रान सांगलां. तातूंतल्या ७ जाणांक मरण आयलां. सगळ्यांची पिराय ६५ वर्सां वयर आशिल्ली आनी तांकां हेर दुयेंसां आशिल्लीं.
केंद्राच्या म्हणण्या प्रमाण तुमकां सारको स्वास घेवंक मेळना, हड्ड्यांत दुखल्यार दोतोरा कडेन रोखडेंच वचचें. हॉट टब वा होम स्पा आसल्यार नेमान सुकोवप, निवळ करप आनी जंतूनाशक करपाची गरज आसा असो सल्लो केंद्र लोकांक दिता. पिवपाचें उदक उकळून पियेवप.
बुरश्या उदकांत लेजिओनेला बॅक्टेरिया आसतात अशें तज्ञ सांगतात. अशें उदक पियेल्यार ताका लेजिओनरी रोग जाता. हो एक प्रकारचो न्युमोनिया. जाण्टे वा आदींच हेर कसल्याय गंभीर दुयेंसांतल्यान ग्रस्त आशिल्ल्या लोकांक ह्या दुयेंसाची भिरांत आसता. चड करून प्रतिजैव वखदां वरवीं हो रोग बरो जाता, पूण हो संसर्ग पुलमांवांत पातळ्ळो जाल्यार दुयेंतीची स्थिती आनीक वायट जावंक शकता. अशे स्थितींत स्वास घेवपाक त्रास जाल्यार वा खर खोंकली येत जाल्यार दोतोराचो सल्लो घेवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
