भांगरभूंय | प्रतिनिधी
पणजी, प्रतिनिधी : भौशीक भलायकी सेवेच्या आवांठा भितर सुपर- स्पेशॅलिटी उपचारांचो आस्पाव आशिल्लो ‘गोवा मॉडेल’ आकार घेतलो आनी फुडल्या स म्हयन्यांत देश हे विशीं उलोवपाक आनी अनुकरण करपाक सुरवात करतलो, अशें भलायकी मंत्री विश्वजीत राणे हांणी शुक्रारा सांगलें.
गोंय वैजकी म्हाविद्यालय आनी हॉस्पिटलाच्या सुपर स्पेशॅलिटी ब्लॉकांत शुक्रारा जोडप्यांची इन विट्रो फर्टिलायझेशन (आयव्हीएफ) उपचारा खातीर मुफत नोंदणी सुरू केल्ल्या. त्या वेळार ते उलयताले. राणे हांणी आम आदमी पार्टी सरकाराच्या सरकाराच्या ‘दिल्ली मॉडेल’ भौशीक भलायकी जतनाय सेवेचेर टिका करतना ती फकत ‘मीडिया हायप’ आसा अशें सांगलें. बरेच पावटीं भलायकेच्या मळार सगळेच ह्या ‘दिल्ली मॉडेला’ विशीं उलयतात. हांव म्हणटां, हें आमचें ‘गोंय मॉडेल’…. आनी, ह्या गोंय मॉडेलांत आमी राज्यांतल्या नागरिकांच्या तोंडार हांसो हाडपा खातीर सेवा दिवपाचो यत्न करतात, अशें राणे हांणी सांगलें.
जीएमसीएचच्या सुपर- स्पेशॅलिटी ब्लॉकांतलें आयव्हीएफ केंद्र पुरायपणान सीएसआर चालीक लायिल्लें आसा आनी पुराय देशांत ताची चर्चा जातली, अशें तें एक पयल्या पांवड्याचें केंद्र करपाचो आमी यत्न करतले, अशें तांणी सांगलें.
‘दिल्ली मॉडेल हें फकत ‘हायप मॉडेल’. उलयतात तशें प्रत्यक्षांत कांय ना. गोंय हें देशांतलें एकमेव राज्य, संवसारीक पांवड्यार पसून, जंय दुयेंतींक आयव्हीएफ उपचार फुकट दितात,’ अशें सांगून खंयच्याच मॉडेलाची प्रतिकृती करप म्हाका नाका, पूण गोंयचें स्वताचें मॉडेल तयार करपाची इत्सा आसा, अशें राणे हांणी सांगलें.
आयव्हीएफ केंद्राक देशांत सगळ्यांत चड येसस्वी दर आशिल्लें अत्याधुनीक केंद्र करपा खातीर मुळावी बांदावळ वा अर्थीक आदार जाय पडटलो तो आमी दितले, अशें उतर राणे हांणी दिलें.
फुडल्या स म्हयन्यांत हांगाच्या भलायकी मळाचेर कितें बदल जातलें तें तुमी पळयतले अशें सांगून रोबोटीक शस्त्रक्रिया केंद्र फुडल्या टप्प्यांत येवपाचें आसा. डाॅ. केदार पडते हांणी आयव्हीएफ केंद्राची संकल्पना साकार करपा खातीर जीएमसीच्या स्त्रीरोग विभागा वांगडा सहकार्य केलें. यशस्वी आनी उत्कृश्ट अशा गोंयच्या खाजगी दोतोरांनी जीएमसी वांगडा येवचें, अशें सरकाराक दिसता, अशें राणे हांणी सांगलें.
डॉ. पडते, जीएमसीचे डीन डॉ. शिवानंद बांदेकार, प्रसूती आनी स्त्रीरोग विभागाचे मुखेली डॉ मुरीएल कार्दोज आनी हेर दोतोर ह्या वेळार हाजीर आशिल्ले.
जीएमसीएचच्या सुपर-स्पेशॅलिटी ब्लॉकांत दोन सप्तकां आदीं मुख्यमंत्री प्रमोद सावंत हांणी सहाय्यक प्रजनन तंत्रज्ञान (एआरटी) आनी गर्भाशयांतल्यान गर्भाधान (आययूआय)/ आयव्हीएफ केंद्र सुरू केल्लें, पूण शुक्रारा कांय जोडप्यांनी उपचारा खातीर नोंदणी केली तेन्ना तें कार्यक्षमपणान सुरू जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
