५० बांदां खातीर जागे निश्चीत
भांगरभूंय | प्रतिनिधी
जानेवारी मेरेन कामाक जातली सुरवात
पणजी,प्रतिनिधी: फुडाराक उदकाचो उणाव जावचो न्हय म्हणून सरकारान पुराय राज्यांत १०० बांद उबारपाक तत्वता मान्यताय दिल्या. ह्या बांदां मदल्या ५० बांदांचे जागे निश्चीत जाल्यात. उदका पुरवण मंत्री सुभाष शिरोडकार हांणी ही म्हायती दिली.
जागे निश्चीत जाल्या त्या बांदांचो ‘एस्टिमेट’ तयार करपाचो वावर सुरू आसा. तो तयार जावन नोव्हेंबर मेरेन निविदा जारी जातल्यो. जानेवारी २०२४ मेरेन काम सुरू जातलें. पावसान काम करपाक मेळना. जानेवारी ते मे ह्या ५ म्हयन्यांत तें पुराय करचें पडटा. जानेवारींत काम सुरू जालें, तरी फुडल्या मे म्हयन्यांत ह्या बांदांतल्यान उदक मेळचें ना. २०२५ वर्सा उदक मेळटलें, अशें मंत्री शिरोडकार हांणी सांगलें.
फुडारांक उदकाचे गरजेचो विचार करून सरकारान बांदांचें नियोजन केलां. कुर्टे बांदाक विरोध जाता. लोकांची समजूत काडपाचो सरकार येत्न करता. लोक आयकना जाल्यार १४४ कलम लागू करपा बगर हेर पर्याय ना. मुर्डी – खांडेपाराय खात्याच्या अधिकार्यांनी लोकांची समजूत काडपाचे येत्न केल्ले. लोक आयकना म्हणून १४४ कलम लागू करचें पडलें, अशें श्री. शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
