भांगरभूंय | प्रतिनिधी
मॉवीन गुदिन्होः पल्लवी धेंपे हांची दाबोळे प्रचाराची दुसरी फेरी
भांगरभूंय । प्रतिनिधी
वास्कोः कांय जाणांच्या नशिबांत हारूच आसता. हे खेपेय तांची हार जातली, असो थोमणो दाबोळीचे आमदार तशेंच पंचायत मंत्री मॉवीन गुदिन्हो हांणी काँग्रेसीच्या दक्षीण गोंय उमेदवाराक मारलो.
काँग्रेस उमेदलार कॅप्टन विरियातो फर्नांडीस हांणी काँग्रेस तिकेटीचेर फाटली विधानसभा वेंचणूक दाबोळी मतदारसंघांतल्यान लडयिल्ली. पूण तांकां गुदिन्हो हांचे कडल्यान हार घेवची पडिल्ली. भाजप उमेदवार पल्लवी धेंपे हांच्या प्रचाराची पयली फेरी सोंपिल्ल्यान आतां दुसरे फेरयेक सुरवात जाल्या. तांणी बिरेस्तारा दीसभरांत दाबोळी मतदारसंघांत आठ कडेन वचून थंयच्या लोकांची भेट घेवन तांचे कडेन संवाद सादलो. पल्लवी धेंपे हांणी चिखलीच्या सांतेरी देवीचो आशिर्वाद घेतलो. ह्या वेळार भटजीन गाराणें घातलें. ह्या वेळार तांचे वांगडा मंत्री गुदिन्हो, भाजप मंडळ अध्यक्ष संदीप सूद, नगरसेवक विनोद किनळेकार, आदले नगराध्यक्ष क्रितेश गांवकार, जयंत जाघव, प्रकाश गांवस, चिखलीचे सरपंच कमलाप्रसाद यादव, उपसरपंच ऐश्वर्या कोरगांवकार, जिल्हो पंचायत वांगडी अनिता थोरात आनी हेर कार्यकर्ते हाजीर आशिल्ले.
दाबोळी मतदारसंघांतल्यान भाजपाचो जो वारो सुरू जाला, तो दक्षीण गोंयांत पावला, पावता. ह्या वाऱ्याक लागून कांय दुबळ्यो सुवातो लेगीत अदीक घटमूट जातल्यो, अशें गुदिन्हो हांणी सांगलें. हे खेपे काँग्रेस उमेदवाराक दोट्टी हार घेवची पडटली. दक्षीण गोंयांत तांचो तग लागचो ना. दाबोळी मतदारसंघांत भाजप उमेदवार मतांची व्हड आघाडी घेतली. दक्षीण गोंयांत भाजप उमेदवार पल्लवी धेंपे मतांच्या व्हड फरकान जिखतली, अशेंय गुदिन्हो हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
