भांगरभूंय | प्रतिनिधी
म्हापशें: गोंय मनीसबळ विकास म्हामंडळाच्या सुरक्षा रक्षकांक सैन्य दळांतल्या जवाना प्रमाण प्रशिक्षण दिलां. हें प्रशिक्षण आपलो फुडार, जीण आनी भलायकी खातीर फायद्याची थारतली. हें प्रशिक्षण तुमी आतां दुसऱ्यांक दिवंक जाय. जेणे करून मुख्यमंत्र्याच्या सहाय्यान गोंयांतलें मनीसबळ वाडोवपाचें उद्दिश्ट साद्य जावन सुरक्षा रक्षक बळांत गोंयचें वेगळें स्थान निर्माण करूं असो विस्वास मनीसबळ विकास म्हामंडळाचे अध्यक्ष आमदार रुडोल्फ फर्नांडीस हांणी उक्तायलो.
कोलवाळे खेळां मैदानार प्रशिक्षण पुराय केल्ल्या म्हामंडळाच्या 88 सुरक्षा रक्षकांच्या पासींग आवट परेड सुवाळ्यांत मुखेल सोयरे ह्या नात्यान रुडोल्फ फर्नांडीस उलयताले. ह्या वेळार उपाध्यक्ष दीपक नायक, कार्यकारी संचालक दशरथ रेडकार, संचालक अरूण नायक, पंच वांगडी रितेश वारखंडकार आनी आदल्यो पंच वांगडी शितल नायक हाजीर आशिल्ल्यो.
ह्या वेळार कार्यकारी संचालक दशरथ रेडकार हांणी म्हणलें, आमच्या प्रशिक्षक अधिकाऱ्यां कडल्यान सगल्यांनी एका म्हयन्याच्या काळांत उत्कृश्ट प्रशिक्षण घेतलां. मार्चपास लेगीत योग्य प्रकारान दिला. येता त्या सप्टेंबर म्हयन्या सावन आतां तुमचे प्रत्यक्ष सेवेक सुरवात जातली. बरी तशेंच प्रामाणीक आनी अखंड सेवा दिवन खात्याचें नांव वयर काडचें अशें आवाहन तांणी केलें.
ह्या वेळार सगल्या प्रशिक्षण पुराय केल्ल्या सुरक्षा रक्षक कर्मचाऱ्यांक चेअरमन रुडोल्फ फर्नांडीस हांचे हस्तुकीं प्रशिस्तीपत्रक भेटयलें. कार्यावळीचें सुत्रसंचालन सिद्धेश बोर्डेकार हांणी केलें. जाल्यार नरेंद्र मयेंकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
