भांगरभूंय | प्रतिनिधी
आयपीएल क्रिकेटीचें करताले बेटींग; 4.5 लाखांचो मुद्देमाल जप्त
पणजी: बेलाविस्ता – सांगोल्ड्यां एका बंगल्यार धाड घालून साळगांव पुलिसांनी इंडियन प्रिमियर लीग (आयपीएल) बेटींग करपी रॅकेट उजवाडा हाडलें. हे कारवायेंत पुलिसांनी गुजरात हांगासरले चंदुलाल ठक्कर, जयेशभाई ठक्कर आनी मयूर पटेल ह्या दुबावितांक अटक केल्या. तशेंच बेटिंगे खातीर वापरिल्ले 12 लॅपटॉप, 10 मोबायल, 3 नोटबूक, 3 रावटर असो 4.5 लाखांचो मुद्देमल जप्त केला.
इंडियन प्रिमियर लीग क्रिकेट सर्त सुरू जातनाच गोंयांत गुजरात, छत्तीसगड, अस्तंत बंगाल हांगासरले क्रिकेट सट्टेबाज सक्रीय जाल्यात. मजगतीं फाटल्या म्हयन्यांत पर्वरी पुलिसांनी साल्वादोर द मुंद हांगा एका बंगल्यार धाड घालून बायलां क्रिकेट प्रिमियर लीग (डब्ल्यूपीएल) बेटींग उजवाडा हाडिल्ली. तशेंच राज्यांत फाटल्या वर्सांत पर्वरे, पिळर्ण-मार्रा, कामराभाट-पणजे, बादे-हणजूणें आनी हेर वाठारांनी भाड्यान बंगले घेवन तातूंत सट्टेबाजी जाताली. गोंय आंतरराष्ट्रीय पर्यटन थळ आशिल्ल्याचो फायदो घेवन गोंयांत व्हड प्रमाणांत आयपीएल सयत हेर क्रिकेट सर्तींचें, फुटबॉल, कबड्डी आनी हेर खेळां प्रकारांतले सट्टेबाज कार्यरत आशिल्ल्याचें मुखार आयलां.
रॉयल चॅलेंजर्स बंगळुरू (आरसीबी) आनी राजस्थान रॉयल्स हांचे मदीं शेनवारा सुरू आशिल्ली आयपीएल मॅची खातीर बेलाविस्ता-सांगोल्ड्यां एका बंगल्यांत ऑनलायन बेटींग सुरू आशिल्ल्याची म्हायती साळगांव पुलिसांक मेळिल्ली. ते प्रमाण उत्तर गोंय पुलीस अधिक्षक अक्षत कौशल आनी उपअधिक्षक विश्वेश कर्पे हांच्या मार्गदर्शना खाला निरिक्षक सोमनाथ माजीक हांच्या फुडारपणा खाला उपनिरिक्षक किशोरकुमार नाईक, हवालदार विशांत मयेंकार, काँस्टेबल विजय पाळणी, यशवंत साखळकार, बायल कॉन्स्टेबल सोनिया म्हालसेकार आनी हेर पंगडान वयले सुवातेर शेनवारा रातीं धाड घालून गुजरातांतल्या चंदुलाल ठक्कर, जयेशभाई ठक्कर आनी मयूर पटेल ह्या तिगां दुबावितांक अटक केली. त्या वेळार पंगडान तांचे कडल्यान 12 लॅपटॉप, 10 मोबायल, 3 नोटबूक, 3 रावटर असो 4.5 लाख रुपयांचो मुद्देमाल जप्त केलो. उपरांत पुलिसांनी वयल्या दुबावितां आड गोंय, दमण आनी दीव भौशीक जुगार प्रतिबंधक कायदो 1976च्या कलम 3 आनी 4 खाला गुन्यांव दाखल करून दुबावितांक रितसर अटक केली. उपरांत अटक केल्ल्या दुबावितांची जामिनार सुटका केली.
मजगतीं, दुबावीत तीन दिसां पयलीं वयले सुवातेर रावत आशिल्ल्याची म्हायती मुखार आयली. ते खातीर दुबावितांच्या इश्टान वयलो बंगलो भाड्यान घेतिल्ल्याची म्हायती मुखार आयली. हे विशीं पुलिसांनी सोमारा बंगल्याचो धनी तशेंच दुबावितांक फुडले चवकशे खातीर आपयिल्ल्याची म्हायती मुखार आयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.