भांगरभूंय | प्रतिनिधी
भावंडांनो,
तु मच्यांतल्या णवे यत्ते मेरेन शिकपी भावंडांच्यो परिक्षा सोंपल्यात. देखून तुमी भोव उमेदीन, खोशयेन सुटयेचे दीस मनयतात. हय काय ना ? पुणून तुमची खोस मनयतना हांवें तुमकां मात्सो धीर धरात म्हूण सांगिल्लें न्हय ? कित्याक तें खबर आसा तुमकां? कारण घरांत तुमची हेर भावंडां आसात जीं धावेची परिक्षा दियत आसात. तुमी घरांत चड आवाज केल्यार तांच्या अभ्यासांत आडखळ येतली. तांचे खातीर ही परिक्षा भोव म्हत्वाची आसा. हें तुमीय जाणात. कारण तुमच्या आई-बाबान तुमकां ताची जाणीव करून दिल्ली आसा. इतलेंच न्हय, तर हांवेंनूय तुमकां आदींच शिटकायल्यांत. म्हणटकच भावंडांनो, तांकां बरे तरेन तांची परिक्षा दिवं हां ? तो मेरेन तुमी मात्शें पाशियेंस काडात हां ?
हां…., भावंडांनो, तुमकां आनीक एक गजाल सांगतां. मेळिल्ले सुटयेचो तुमकां बरे तरेन लाव जावचो वा तुमी ते सुटयेचो वापर बरे तरेन करून घेवचो हे खातीर भोंवतणच्या जायत्या समाज वावुरपी संस्थानीं, क्लबांनीं, मंडळानीं तशेंच शिक्षणीक सुवातांचेर तुमचे खातीर सुट्यांतलीं शिबिरां, कार्यशाळा आयोजीत केल्यात. कोणें नाट्य शिबिरां जाल्यार कोणें चित्रकलेची म्हळ्यार पेंटींग, ड्रॉईंग, क्राफ्ट, टाकावूंतल्यान टिकावू वस्तू तयार करपाची तशेंच गायन, वादन, नाच, योगा, हेर खेळांची शिबिरां आयोजीत केल्यांत. भावंडांनो, ह्या शिबिरांचो तुमी वेळांत वेळ काडून लाव घेयात हां… शिक्षणावांगडा हे कलेचोय थोडोसो वा चड अभ्यास तुमकां गरजेचो आसा. ह्या असल्या शिबिरांनी वांटो घेवन तुमी तुमकां जाय ती कला शिकून घेयात हां… तुमच्या जिविताक एक वेगळीच बुनयाद घालून घेयात. कित्याक सांगतां जाणा ? आयकात…
भावंडांनो, हे कलेक आमच्या जिवितांत भोव म्हत्व आसा. कला ही कले खातीर आसता. तेचपरी भावंडांनो, ही कला आमचे जिविता खातीर आसता. जिवितांत आनंद, खोशी मेळोवपाचें वा दिवपाचें काम ही कला करता. हे कलेवरी मेळपी आनंद, खोशी, धादोसकाय, संवसारांतल्या सगळ्या आनंदापरस श्रेश्ठ, व्हड आसा. ताची तुळा हेरा कडेन जायना. मनशाचें मन कसलेय गजालींक लागून जेन्ना खंतीत जाता, विरूस जाता, तेदेवेळार ही कला आनंद दिवन मनाक फुलयता, उर्बा दिता. मनशाक जगपाक प्रेरणा दिता. स्वताक आनंद मेळटाच, पुणून हेच कलेवरवी तुमी दुसऱ्यांक, तुमच्या भोंवतणच्यांक आनंद दिवंक पावतात. तांकां खोशी, धादोशीत करूंक वा दवरूंक पावतात.
दुसऱ्यांक आनंद दिवप, खोशी दवरप हें देवाचें काम. तें काम तुमच्या हातांतल्यान घडून येता. ते कलेंतल्यान तुमच्या वांट्याक व्हडपण येता. म्हणटकच मुजरत ह्या तरेकवार कलांच्या शिबिरांनीं, कार्यशाळांनीं वांटो घेयात. नकळटां, तुमी व्हड कलाकार जावपाक पावतलीं. आयकतलीं न्हय म्हजें ? आयकातूच. आनी एक,. .. तुमीं ह्या शिबिरांनी कितें शिकतात तें आमकांय कळयात हां. वाट पळयतां. चलात तर येयात आंगणांत…
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
