भांगरभूंय | प्रतिनिधी
इंडीयन प्रिमीयर लिगेंत (आयपीएल) आयज पंजाब किंग्स घरच्या मैदानाचेर रॉयल चॅलेंजर्स बंगळुरू आड खेळटलो. रॉयल चॅलेंजर्स बंगळुरू जैताच्या मार्गार आयला आनी विराट कोहलीक धर्मशालाच्या मैदानाचेर खेळपाक आवडटा. ताणें ह्या मैदानाचेर णवांतल्या स डावांनी अर्द शेंकडे मारल्यात. हातूंत पोरूं न्युझिलॅण्डा आड 104 बॉलांनी काडिल्ल्या 95 धांवड्यांचो लेगीत आस्पाव आसा. पूण, ताच्या मुखार फास्ट बॉलर कगिसो रबाडा आसतलो. ताणें कोहलीक 13 टी-20 डावांनी चार खेपे बाद केला. ताका सोडलो जाल्यार कोहली पंजाबाच्या सगल्यां बॉलरां आड सहज खेळटा.
निवडींत सातत्य आनी खेळगड्यांच्या स्मार्ट पुलाचे निवडीन चेन्नय सुपरकिंग्स आनी राजस्थान रॉयल्स फाटल्या दोन हंगामांनी येसस्वी टी-20 पंगड थारल्यात. तांच्या जैताची टक्केवारी 60 आसा.
चेन्नय सुपरकिंग्सान 26 जाल्यार राजस्थान रॉयल्सान 27 खेळगड्यांचो वापर केला. पंजाब किंग्सान फकत 24 खेळगड्यांचो वापर केला.
कोहलीक सोडलो जाल्यार बंगळुरूचे टॉप ऑर्डर बॅट्समन लिगेचे सुरवातीक संघर्श करताले. सुरवातीच्या पांच मॅचींनी ताणें पावरप्लेंत णव विकेटी वगडायल्यात आनी 8.46चे रन रेटीन धांवड्यो केल्यात. सवे मॅची सावन पंगड वेवस्थापनान विल जॅक्साक खेळयलो आनी ते उपरांत बंगळुरून फुडल्या स मॅचींनी फकत सातूच विकेटी पावर प्लेंत व्हगडायल्यो आनी धांवड्यो लेगीत 11.47चे रन रेटीन केल्यो. जॅक्सान टॉप ऑर्डरांत स्थिरताय हाडली. तो आयल्या उपरांत ग्लॅन मॅक्सवॅल, कॅमेरून ग्रीन आनी दिनेश कार्तिक हांकां मेकळेपणान खेळपाची संद मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
