हैदराबादा कडल्यान लखनौचो धूप

भांगरभूंय | प्रतिनिधी

सनरायझर्स हैदराबादान अंदूंचे इंडीयन प्रिमीयर लिगेंतलो (आयपीएल) आतां मेरेनचो जबरदस्त खेळ करून दाखयलो. लखनौ सुपर जायण्ट्सान दिल्ली 166 धांवड्यांची मोख हैदराबादान 10 ओव्हरींनी मेळयली. अभिषेक शर्मा आनी ट्रॅव्हिस हेड हांणी स्लो खेळपट्टीचेर लेगीत आक्रमक शॉर्ट मारून पंगडाक पावर प्लेंत 107 धांवड्यो करून दिल्यो.

आयपीएलाच्या इतिहासांत पावर प्लेंत दोन खेपे 100+ धांवड्यो करपी हैदराबाद पयलो पंगड थारलो. ताणें ह्याच हंगामांत दिल्ली कॅपिटल्सा आड पयल्या स ओव्हरींनी सगल्यांत चड 125 धांवड्यो करून विक्रम नोंदयिल्लो.

लखनौन पावरप्लेंत 2 विकेटी व्हगडावन फकत 27 धांवड्यो केल्ल्यो. ताका लागून हैदराबादाक 166 धांवड्यो करप कठीण जातलें अशें दिशिल्लें. पूण, अभिषेक आनी ट्रॅव्हिस हांणी सगल्यांचो अदमास चुकयलो. नवीन हकाचे पांचवे ओव्हरींत ट्रॅव्हिसान वादळ हाडलें. ताणें फकत 16 बॉलांनी अर्द शेंकडो पुर्ण केलो. हातूंत पांच चवक्यांचो आनी पांच सक्यांचो आस्पाव आशिल्लो. ट्रॅव्हिस हेडान 18 बॉलांनी 58 धांवड्यो केल्यो. ताणें सात चवके आनी पांच सके मारले. अभिषेकान 19 बॉलांनी आपलो अर्द शेंकडो पुर्ण करीत ट्रॅव्हिसाक बरी साथ दिली.

हैदराबादान 9.4 ओव्हरींनी बिनबाद 167 धांवड्यो करून जैत जोडलें. आयपीएलाच्या इतिहासांत 150 परस चड धांवड्यांचो फाटलाव 10 ओव्हरीं भितर करपी हैदराबाद पयलो पंगड थारलो.

अभिषेकान 28 बॉलांनी आठ चवके आनी स सक्यांचे मजतीन नाबाद 75 धांवड्यो केल्यो. ट्रॅव्हिसान 30 बॉलांनी आठ चवके आनी आठ सक्यां सयत नाबाद 89 धांवड्यो केल्यो.

ह्या जैता सयत हैदराबाद गुणतकट्यांत 14 गुणां सयत तिसरे सुवातेर पावलो.

सनरायझर्स हैदराबादाची फिल्डिंग उत्कृश्ट थारली. नितीश कुमार रेड्डी आनी सनवीर सिंग हांणी जबरदस्त कॅची धरून पावर प्लेंत लखनौ सुपर जायण्ट्साची हवाच काडून घेतली. मुखेली लोकेश राहुल आनी कृणाल पांड्या हांणी संघर्श करून डाव सांबाळ्ळो. पूण, हैदराबादाच्या बॉलरांनी धांवड्यांचेर अंकूश दवरिल्लो. हैदराबादाक केल्ले फिल्डिंगेक पुर्ण गूण फावतात. निकोलस पुरन आनी आयुष बदोनी हांणी लखनौक लजेप पडपा पसून वाटायलो.

लोकेश राहुलान टॉस जिखून पयलीं बॅटींग करपाचो निर्णय घेतलो. हैदराबादाचो अणभवी बॉलर भुवनेश्वर कुमारान दोन विकेटी घेवन लखनौक सुरवातीकूच थर धपके दिले. नितीश कुमार रेड्डी आनी सनवीर सिंग हाणें उत्कृश्ट कॅची धरल्यो. क्विंटन डी कॉक (5) आनी मार्कस स्टॉयनीस (3) पावर प्लेंत बाद जाले. लखनौक पयल्या स ओव्हरींनी 2 विकेटी व्हगडावन फकत 27 धांवड्यो करप शक्य जाल्यो आनी अंदूंच्या हंगामांतली ही पावर प्लेंतली तिसरी बाबत कामगिरी थारली.

भुवनेश्वरान आपल्या पयल्या तीन ओव्हरींनी फकत सात धांवड्यो दीत 2 विकेटी घेतल्यो. राहुल खेळपट्टीर उबो आशिल्लो. पूण, हैदराबादाच्या बॉलरांनी ताचेर बरेंच चेपण दवरिल्लें. कृणाल पांड्या चवथे सुवातेर बॅटिंगेक आयलो. ताणें जयदेव उनाडकटाक दोन सके मारून पंगडा वयलें चेपण कांय प्रमाणांत उणें केलें. आयपीएलाच्या अंदूंच्या हंगामांतलो हो 1 हजारावो सको थारलो.

आयपीएलाच्या सेगीत तिसऱ्या हंगामांत एक हजारा परस चड सके जाल्यात. सगल्यांत चड सके पोरूंच्या हंगामांत मारिल्ले. त्या हंगामाचो विक्रम मोडपाक अजून 125 सक्यांची गरज आसा.

पॅट कमिन्सान 10वे ओव्हरींत लोकेशाक (29) बाद करून लखनौक तिसरो धपको दिलो. 12वे ओव्हरींत कमिन्साच्या उत्कृश्ट थ्रोचेर कृणाल (24) धांवबाद जालो. स्लो खेळपट्टीचेर हैदराबादाच्या बॉलरांनी बरी बॉलींग घाली.

निकोलस पुरन आनी आयुष बदोनी हांणी पांचवे विकेटी खातीर 31 बॉलांनी अर्द शेंकड्याची भागिदारी करून लखनौक थाकाय दिली. स्लो खेळपट्टीचेर जम बसयल्या उपरांत बदोनीन कांय आकर्शक शॉर्ट मारले. भुवनेश्वरान चार ओव्हरींनी 12 धांवड्यो दीत 2 विकेटी घेतल्यो.

बदोनी आनी पुरन हांणी अखेरच्या ओव्हरींनी टी नटराजनाक टार्गेट केलो. निमाण्या चार ओव्हरींनी दोगांयनी मेळून 50 धांवड्यो केल्यो. बदोनीन 28 बॉलांनी आयपीएलांतलो चवथो अर्द शेंकडो पुर्ण केलो. अंदूंच्या हंगामांतलो ताचो हो दुसरो अर्द शेंकडो थारलो. पुरन आनी बदोनी हांणी 52 बॉलांनी 99 धांवड्यांची भागिदारी केली. बदोनीन 30 बॉलांनी णव चवक्यां सयत नाबाद 55 आनी पुरनान 26 बॉलांनी स चवके आनी एका सक्या नेटार नाबाद 48 धांवड्यो केल्यो. अशे तरेन लखनौन 4 विकेटी व्हगडावन 165 धांवड्यो केल्यो.