भांगरभूंय | प्रतिनिधी
पणजीः हणजूण दर्यादेग वाठारांत सीआरझॅड आनी एनडीझॅड वाठारांत नेमांचे उल्लंघन करपी 11 आस्थापनां गोंय दर्यादेग वाठार वेवस्थापन प्राधिकरणान मोडपाचो आदेश दिला. परवानगी दितना घाल्लून दिले अटी आनी नेमा प्रमाण ही आस्थापनां उबारूंक नाशिल्ल्यान तशेंच ही आस्थापनां कायदेशीर आसा हे सिध्द करपाक कागदपत्रां दाखोवपाक अपेसी थारिल्ल्यान प्राधिकरणान ही आस्थापनां मोडपाचो आदेश जारी केला.
हणजूण दर्यादेग वाठारांत सीआरझॅड आनी एनडीझॅड वाठारांत नेमांचे उल्लंघन करपी 175 आस्थापनां सील करपाचो आदेश उच्च न्यायालयान फाटल्या म्हन्यांत दिल्लो. पंचायत राज कायदो आनी गोंय जमीन उदरगत आनी बांदकाम कायद्या खाला ह्या आस्थापनांनी बांदकामा खातीर परवानगी घेतल्या वा ना ताची पळोवणी करची असो न्यायालयान आदेश दिल्लो. ते प्रमाण पंचायत आनी जीसीझॅडएमान पळोवणी करून 175 आस्थापनां सील करून तांकां कारणां दाखयात नोटीस धाडिल्ली.
ह्या नोटिसेक जाप दिवपा खातीर एप्रील 2 वेर 35 आस्थापनांच्या धनयांक जीसीझॅडएमएचे बसकेक आपयिल्लें. तातूंतल्या 11 जाणांक आस्थापनां मोडपाचो आदेश दिला. जाल्यार आपली आस्थापनां ही 1991 वर्सा आदली आनी ती कायदेशीर आशिल्ल्याचे सिद्ध करपी कागदपत्रां दाखोवपी दोन आस्थापनां प्राधिकरणान साल्वार केल्यात. जाल्यार 22 आस्थापनांची सुनावणी फुडें धुकल्ल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
