भांगरभूंय | प्रतिनिधी
संघटन शक्ती, योग्य नियोजनाच्या नेटार 2014 उपरांत भाजपा दोनूय सुवातो जिखपाचो अदमास
पणजीः लोकसभेची उत्तर गोंय आनी दक्षीण गोंयची सुवात हे खेपे भाजप जिखतलो, असो अदमास राजकी मळार उक्तायतात. काँग्रेस कडेन कार्यकर्त्यांचो उणाव आशिल्लो. भाजपा कडेन सक्रीय कार्यकर्त्यांची फौज आशिल्ली. तशेंच उत्तर गोंयांत पर्ये, सांखळी, वाळपय, मयें आनी दिवचलें श्रीपाद नायक हांकां मताधिक्क्य जाल्यार सांगें, सांवड्डें, काणकोण, शिरोडें ह्या मतदारसंघांत वाडिल्लें मतदान पल्लवी धेंपो हांच्या फायद्याचें थारपाक शकता. दोनूय मतदारसंघांत रिव्हॉल्यूशनरी गोवन्स (आरजीपी) मोट्या प्रमाणांत मतां मेळोवपाची शक्यताय आसा.
उत्तर गोंयांत हे खेपे श्रीपाद नायक, काँग्रेसचे अॅड. रमाकांत खलप आनी आरजीपीचे मनोज परब हांचे मदीं तिरंगी लडत जाल्या. ताका लागून उत्तरेंत कोण बाजी मारता, हाचे कडेन सगल्यांची नदर आसा.
उत्तर गोंयांत हे खेपे 77.69 टक्के मतदान जालां. हळदोणें आनी सांतअांद्रें हे दोन मतदारसंघ वगळ्ळ्यार हेर 18 तल्यान 17 आमदार भाजपाचे आनी एक आमदार मगोचो आसा. भाजपाची मगो कडेन युती आशिल्ल्यान ह्या अठरांतल्यान भोवतेक मतदारसंघांत श्रीपाद नायक हांकांच चड मतां पडपाची शक्यताय आसा.
हे खेपे उत्तर गोंयांतल्या पर्ये, सांखळी, वाळपय, मयें आनी दिवचल ह्या पांच मतदारसंघांत 1,31,037 मतदारांनी मतदान केलां. हे पांचूय मतदारसंघ भाजपाच्या ताब्यांत आशिल्ल्यान थंयच्यान श्रीपाद नायक हांकां चड मतांची आघाडी मेळटली, अशें भाजपाक दिसता. श्रीपाद नायक हांचे विशींची निरशेणी मतदारांनी प्रचार वेळार उक्तायल्या. तरी लेगीत मुख्यमंत्री डॉ. प्रमोद सावंत, भाजप प्रदेशाध्यक्ष सदानंद शेट तानावडे हांचे सयत उत्तर गोंयांतले मंत्री आनी सगल्याच आमदारांनी नेटान प्रचार केल्लो. ताचो फायदो श्रीपाद नायक हांकां मेळटलो. 2019 चे वेंचणुकेंत उत्तर गोंयांतल्या 20 मतदारसंघा मदीं 16 मतदारसंघांत श्रीपाद नायक हांणी वर्चस्व मेळयिल्लें. पूण, कळंगूट, ताळगांव, सांताक्रूज आनी सांतआंद्रें ह्या चार मतदारसंघांत मात काँग्रेसच्या गिरीश चोडणकार हांकां आघाडी मेळिल्ली. ह्या चार मतदारसंघां मदीं कळंगूट वगळ्ळ्यार हेर तीन मतदारसंघ त्या वेळार काँग्रेस कडेन आशिल्ले. हे खेपे हातूंतले तीन मतदारसंघ भाजपा कडेन आशिल्ल्यान ताचो फायदो श्रीपाद नायक हांकां मेळपाक शकता. पूण कळंगूट, पणजी, सांताक्रूज, ताळगांव ह्या मतदारसंघांत रमाकांत खलप हांकां मोट्या प्रमाणांत मतां मेळपाची शक्यताय आसा.
दक्षीण गोंयांत हे खेपे 74.47 टक्के मतदान जालां. ह्या मतदारसंघांतल्या 20 मतदारसंघांतल्यान 12 मतदारसंघ भाजपा कडेन आसात. तशेंच मगोचो एक आमदार आनी दोन अपक्ष भाजपा वांगडा आसात.
भाजपा कडेन अाशिल्ल्या 12 मतदारसंघांत 2,72,095, दोन अपक्षांच्या मतदारसंघांत 44,931 आनी मगो कडेन आशिल्ल्या मडकय मतदारसंघांत 22,304 अशी मेळून ह्या मतदारसंघांत 3,39,330 मतदान जालां. तातूंत सांगें, सांवड्डें आनी काणकोण ह्या तीन मतदारसंघांत विक्रमी 73,833 मतदान जाल्ल्यान आनी हे तिनूय मतदारसंघ भाजपा कडेन आशिल्ल्यान पल्लवी धेंपो हांकां ह्या तीन मतदारसंघांतल्यान व्हड आघाडी मेळटली. दक्षीण गोंयांतले वेंचणुकेंत ख्रिस्ती धर्मियांचो प्रभाव आशिल्ल्यान साश्ट म्हाल सदांच केंद्रसुवातेर आसता. थंयच्या 8 मतदारसंघां मदीं तीन मतदारसंघ हे खेपे भाजपा कडेन आशिल्ल्यान साश्टीतलीं चडांत चड मतां मेळोवपाक हे खेपे येस मेळपाची शक्यताय आसा.
…………………….
इंडी आघाडेक फटको बसपाची कारणां
-राज्यांतल्यो दोनूय सुवातो जिखपाची संद हे खेपे इंडी आघाडेच्या उमेदवारांक आशिल्ली. पूण प्रचारांत अखेरे मेरेन इंडी आघाडी फाटीं उरली.
-इंडी अाघाडी कडेन उत्तर गोंयांत एक, जाल्यार दक्षीण गोंयांत पांच आमदार आसात. पूण तांचो प्रभाव वेंचणुकेंत जाणवलो ना.
-स्टार प्रचारकांचे वळेरेंत राहूल गांधी, सोनिया गांधी, प्रियंका गांधी, सचीन पायलट अशा नामनेच्या फुडाऱ्यांचो आस्पाव आशिल्लो. पूण तातूंतलो एकूय व्हड फुडारी प्रचाराक येवंक ना.
-काँग्रेसी कडेन बूथ पांवड्यार कार्यकर्तेच नात. ताका लागून मतदारांक मतदान केंद्रा मेरेन हाडपाक काँग्रेसीक अपेस आयलें.
– इंडी आघाडेंतल्या हेर पक्षांच्या फुडाऱ्यांचो उत्तर गोंयांत प्रभाव ना. दक्षीण गोंयांत अंतर्गत मतभेदांक लागून काँग्रेस तशेंच इंडी आघाडेंतल्या फुडाऱ्यांनी थारावीक वाठारातूय प्रचाराचेर नेट दिलो. जायत्या वाठारांनी इंडी आघाडीचे फुडारी पावलेच नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
