भांगरभूंय | प्रतिनिधी
10 दीस चल्लें प्रशिक्षण; अभय जोग हांचें मार्गदर्शन
वाळपय: सरकारी मुळावी शाळा गुळेले आयोजीत केल्ल्या धा दिसांचें नाट्यप्रशिक्षण शिबिराचो समारोप जालो. समारोप सुवाळ्यांत मुखेल सोयरे म्हूण नाट्य प्रशिक्षण शिबिराचे प्रशिक्षक अभय जोग हाजीर आशिल्ले. तशेंच आयोजक मुख्याध्यापक सुरज नायक, चित्रकला शिक्षक प्रेमानंद च्यारी, जेश्ठ शिक्षिका अपर्णा सावयकार, शिबीर संयोजक संगीत शिक्षक नितेश देसाय, चंद्रकांत नायक, कविता पिरणकार हाजीर आशिल्ले.
ह्या वेळार उलयतना मुख्याध्यापक सुरज नायक हांणी म्हणलें, संगीत शिक्षकांनी हें शिबीर सुचीत करून योग्य तरेन पार पाडिल्ले खातीर अभिनंदन केलें. हें शिबीर म्हणल्यार विद्यार्थ्यांक व्यापक नाट्यकलेची श्रीगणेशा आसून तांचो आत्मविस्वास वाडटलो आनी हे विद्यार्थी आपले योग्यताये प्रमाण नाट्यकला वाडीक लायतले अशें तांणी म्हणलें.
सगल्या विद्यार्थ्यांक विवीध नाट्यरंग शिकयतना आयिल्ले अणभव प्रशिक्षक अभय जोग हांणी सांगलें. विवीध विशय शिकयतना जर तो नाट्यमय रितीन शिकयत जाल्यार तो बरे तरेन समजतलो अशें तांणी म्हणलें.
ज्येश्ठ शिक्षिका अपर्णा सावयकार हांणी कार्यावळीचें प्रास्तावीक आनी येवकार दिलो. पुर्वा, प्राची, रतिक्षा ह्या विद्यार्थ्यांनी सोयऱ्यांक फुलांतुरे भेटयले. सगल्या विद्यार्थ्यांक सोयऱ्यां हस्तुकीं प्रशस्तिपत्रक दिलें. पुजा नायक आनी शांताराम मळेकार ह्या विद्यार्थ्यांनी आपले अणभव सांगलें. सगल्यांत पयलीं धा दिसा भितर शिकयिल्ल्या विवीध नाट्य कुशळटायेचो आविश्कार म्हूण विद्यार्थ्यांनी एक संगीत नाट्यपुश्प सादर केलें. उपरांत बाय श्रव्या पंकज काणेकार हाणें नाच सादर केलो.
कार्यावळीचें सुत्रसंचालन संगीत शिक्षक नितेश देसाय हांणी जाल्यार उपकार शारिरीक शिक्षक आनिध्य पोकळे हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
