भांगरभूंय | प्रतिनिधी
शिवसेने कडल्यान शिंदे हांकां मुख्यमंत्रीपदाची, भाजपा कडल्यान उपमुख्यमंत्रीपदाची ऑफर
खबरां संस्था
मुंबयः फाटल्या कांय म्हयन्यां पसून शिवसेनेंत नाराज अाशिल्ले फुडारी एकनाथ शिंदे हांणी विधानपरिशद वेंचणुके उपरांत समर्थक आमदारां सयत बंड केल्ल्यान शिवसेनेंत उबी वेर पडल्या. म्हाविकास आघाडींतल्यान भायर पडून शिवसेनेन भाजपा वांगडा युती करची अशी अट शिंदे हांणी ठाकरे हांचे कडेन उक्तायल्या.
ताका लागून महाराष्ट्रांतले म्हाविकास आघाडी सरकार संकश्टांत आयलां.
मुख्यमंत्री उद्धव ठाकरे हांणी काल ‘वर्षा’ बंगलो सोडलो. ते सध्या मातोश्री बंगल्याचेर आयल्यात.
एकनाथ शिंदे हांच्या बंडखोरी उपरांत महाराष्ट्रांत निर्माण जाल्ल्या राजकी वावटळीचो फुडलो अंक सुरू जाल्ल्याचे पळोवपाक मेळटा. एके वटेन मुख्यमंत्री उद्धव ठाकरे हांणी फेसबूक लायव्हच्या माध्यमांतल्यान भावनीक उतरांत व्यथा मांडल्या.
दुसरे वटेन तांणी एकनाथ शिंदे हांकां थेट मुख्यमंत्रीपदाची ऑफर दिल्या. हे फाटभुंयेर शिंदे हांच्या बंडखोरी नाट्याक व्हड मोडण मेळपाची शक्यताय निर्माण जाल्या.
भाजपा वांगडा सत्ता स्थापन करपाची अट एकनाथ शिंदे हांणी घातले उपरांत स्वता मुख्यमंत्री ठाकरे हांणी शिवसैनिकूच मुख्यमंत्री जालो जाल्यार खोस आसा, अशी भुमिका मांडल्या.
एकनाथ शिंदे हांचे सयत 33 आमदार सुरतांततल्यान विमानान आसामांतल्या गुवाहाटींत पावल्यात. ते उपरांत पत्रकारां कडेन उलयतना शिंदे हांणी आपले वांगडा 40 आमदार आशिल्ल्याचो दावो
केला.
शिवसेनेचे 40 आमदार आपले वांगडा आसात. आमी सगले जाण बाळासाहेबांचे हिंदुत्व आनी भुमिका मुखार घेवन वतले. आपणाक कोणाचेर टिका करपाची ना, अशें शिंदे हांणी सांगलें.
मुख्यमंत्री उद्धव ठाकरे हांणी फेसबूकच्या माध्यमांतल्यान आपली भुमिका मांडल्या. तांणी बंडखोर आमदारांक समोरासमोर येवन आपूण मुख्यमंत्रीपदा खातीर लायक नाशिल्ल्याचें सांगचें, अशें आवाहन केलां. तशेंच मुख्यमंत्रीपद अानी शिवसेना पक्षमुखेल्याची जापसालदारकी सोडपाची तयारी दाखयल्या.
मजगतीं, राज्यसभा वेंचणुकेंत शिवसेनेचीं मतां फुटपाचीं आनी राज्य सरकार अस्थीर जावपाचीं चिन्नां दिसपाक लागिल्लीं.
भाजपाच्या जैता उपरांत उलयतना विरोधी पक्षफुडारी देवेंद्र फडणवीस हांणी ही राज्यांतल्या बदलत्या समिकरणांची नांदी आशिल्ल्याचे म्हणिल्लें. तेच रातीं हालचाली जाल्यो आनी शिंदे समर्थक आमदारां सयत सूरतांत पावले.
एकनाथ शिंदे हांणी कितें म्हणलें…
फाटल्या अडेज वर्सांत म्हाविकास अाघाडी सरकाराचो फायदो फक्त घटक पक्षांक जालो. एके वटेन घटक पक्ष घटमूट जायत आसतना शिवसैनिकांचें आनी शिवसेनेचें मात पद्दतशीर खच्चीकरण जायत आसा.
आमी सगले आमदार एकठांय आसात. आमी बाळासाहेबांच्या विचारांचेर विस्वास दवरपी कार्यकर्ते आसात. आमचे कडेन फावो ताचे परस चड आमदारांचें संख्याबळ आसा.
मुख्यमंत्री उद्धव ठाकरे हांणी राजिनामो दिवचो ना हे विशीं तांणीच निर्णय घेवचो. आमी फुडली दिका थारावपाक आमदारांची बसका घेतले.
शिवसेना आमदाराक मारपेट केल्ल्याचो आरोप जाता, पूण हें फट आसा. गुजरातांत खंयच्याच आमदाराक मारपेट करूंक ना.
शिवसेनेचे 40 आमदार आपले वांगडा आसात. तशेंच आनीक 10 आमदारांचो आमकां तेंको आसा. ते बेगिनूच आमकां येवन मेळटले.
शिंदें हांचें बंड शिवसेनेची अंतर्गत बाबः पवार
शिवसेनेचे फुडारी एकनाथ शिंदे हांणी पक्षाविरोधांत केल्लें बंड ही शिवसेनेची अंतर्गत बाब आशिल्ल्याचे स्पश्ट करून राष्ट्रवादी काँग्रेसचे अध्यक्ष शरद पवार हांणी शिवसेनेंतल्या बंडाचेर चड उलोवप टाळ्ळें. पूण मुख्यमंत्री उद्धव ठाकरे हांच्या नेतृत्वाचेर म्हाविकास आघाडींतल्या घटक पक्षांचो विस्वास आसून ह्या राजकी संकश्टांतल्यान मार्ग काडटले, अशें पवार हांणी म्हणलें.
भाजपा प्रस्तावाचेर शिंदे हांचे भुमिके कडेन नदर
भाजपाच्या राजकारणांत भुंयकांप हाडपी एकनाथ शिंदे हांच्या बंडाक आतां वेगळे मोडण मेळत आसा. मेळिल्ले म्हायती प्रमाण एकनाथ शिंदे हांकां भाजपा कडल्यान उपमुख्यमंत्रीपदाची ऑफर दिल्या. भाजपाच्या प्रस्तावाचेर एकनाथ शिंदे कितें भुमिका घेतात, हे बेगिनूच स्पश्ट जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
