भांगरभूंय | प्रतिनिधी
धरण वाठारांनी लेगीत पावसाचो नेट कायम
पणजी: गोंयांत पावसाचें प्रमाण उणें आशिल्ल्यान धरणांतलें उदक उणें जाल्लें. पूण फाटले दोन दीस गोंयांत नेटाचो पावस पडिल्ल्यान धरण वाठारांनी लेगीत पावसाचो नेट कायम आशिल्लो. हाका लागून विवीध धरणांतल्या उदका सांठ्यांनी 0.4 ते 2 टक्क्यां मेरेन वाड जाल्या. दोन दिसांत गावणें धरणांतलें उदक सगल्यांत चड दोन टक्क्यांनी वाडलें. जाल्यार अंजूणें धरणांतलें उदक 0.4 टक्क्यांनी वाडलां. फुडले कांय दीस पावसाचो नेट काम उरत जाल्यार धरणांतल्या उदकाचे पातळेंत आनीक वाड जावपाची शक्यताय आसा.
मेळिल्ले म्हायती प्रमाण 22 जून दिसा गावणें धरणांत 44.9 टक्के उदका सांठो शिल्लक आशिल्लो. 24 जून अखेरेक तातूंत वाड जावन तो 46.9 टक्के जालाे. अंदूं काणकोण म्हालांत पावसाचें प्रमाण सगल्यांत चड आसा. हाका लागून चापोली धरणांतलो उदका सांठो दोन दिसांत 1.8 टक्क्यांनी वाडून 43.1 टक्के जाला. 22 जूनाक आमठाणें धरणांत 51 टक्के उदका सांठो आशिल्लो. 24 जून अखेरेक तातूंत वाड जावन तो 52.8 टक्के जालाे. दोन दिसांत ह्या धरणांतलो उदका सांठो लेगीत 1.8 टक्क्यांनी वाडला.
दक्षीण गोंयची तान भागोवपी साळावली धरणांत 22 जूनाक 27 टक्के उदका सांठो आशिल्लो. 24 जून अखेरेक तातूंत वाड जावन 27.5 टक्के जालो. पंचवाडी धरणांतलो उदका सांठो दोन दिसांत 0.6 टक्क्यांनी वाडून 18.1 टक्के जालाे. 22 जून दिसा ह्या धरणांत 17.5 टक्के उदका सांठो शिल्लक आशिल्लो. 24 जून अखेरेक ह्या धरणांत 18.1 टक्के उदक आसा. 22 जून दिसा अंजूणें धरणांत 8.3 टक्के उदका सांठो शिल्लक आशिल्लो. 24 जून अखेरेक तातूंत वाड जावन तो 8.7 टक्के जालाे. 24 जून अखेरेक तिळारी धरणांतल्या उदका खातीर 22 जून इतलोच म्हणल्यार 28.8 टक्के आसा.
मजगतीं, बुधवारा गोंयांत सेगीत पावसाची नोंद जाली. 24 वरांत सरासरी 2.24 इंच पावसाची नोंद जाली ह्या वेळार काणकोणां सगल्यांत चड 3.81 इंच पावस पडलो. हवामान खात्यान गोंयांत 25 ते 30 जून मजगतीं मध्यम स्वरुपाच्या पावसाची शक्यताय उक्तायल्या. ते प्रमाण ह्या स दिसां खातीर पावसाचो यलो अलर्ट जारी केला.
गोंयांत 1 ते 24 जून मजगतीं सरासरी 13 इंच पावसाची नोंद जाल्या. अंदूं पावसाचें प्रमाण 52.2 टक्क्यांनी उणें आसा. मजगतीं काणकोणां 29.81 इंच, मडगांवां 15.77 इंच, म्हापश्यां 13.39 इंच, पेडण्यां 12.75 इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
