भांगरभूंय | प्रतिनिधी
दर्यांत फातराचेर बशिल्लो, पडलो, बुडलो
भांगरभूंय । प्रतिनिधी
पणजी : गोंयांतले आकर्शक दर्यादेगो, फेसाळ ल्हारां हांचो थरार पळोवपा खातीर देशी- विदेशी पर्यटक गोंयांत येतात. पर्यटना खातीर आयिल्ले कांय पर्यटक भलतेंच धाडस करतात आनी कांय खेपे जीव वगडायतात. अशेंच धाडस अश्पाक मसाली (33. रा. बिजापूर, कर्नाटक) हाका भुजलें. बुधवारा दनपारां बागा- हडफड्यां दर्यांतल्या फातराचेर बसून फेसाळ ल्हारां पळोवप ह्या तरणाट्याक म्हारग पडलें.
नेटाच्या ल्हारा वांगडा अश्पाक दर्यांत उसळून पडलो. दर्यांत पडले उपरांत पेवन जीव वाटावपाची ताणें खूब धडपड केली. मात दर्या खुबळिल्लो आशिल्ल्यान ल्हारांच्या चपक्यांत तो तरणाटो बुडलो. कांय वेळान ताची कूड व्हावन दर्यादेगेर आयली. हे संबंदांतली म्हायती मेळटाच पुलिसांनी घडणुकेचे सुवातेर धांव घेतली आनी तरणाट्याची वळख पटोवपाचे यत्न सुरू केले. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
