भांगरभूंय | प्रतिनिधी
पणजीः माॅन्सुनाच्या पावसान नेट धरिल्ल्यान भातशेतांक आतां उर्बा मेळ्ळ्या. गोंयभरच्या शेतांनी नांगरणेक गती मेळ्ळ्या आनी अंदूंचो शेतकी हंगाम फुलोवपा खातीर शेतकार सज्ज जाल्यात. पावसाचो अदमास घेवनच शेतकारां खातीर शेतांचें वेळापत्रक तयार जालां आनी अंदूंचो माॅन्सून भात शेतां खातीर सामको अनुकूल आसा, अशीं म्हायती शेतकी खात्याच्या वरिश्ठ अधिकाऱ्यान दिली.
माॅन्सून पावसाक कळाव जाल्ल्यान शेतकार चिंतेंत आशिल्ले. आतां पावसान नेट धरिल्ल्यान शेतकारां मदीं नवी उमेद तयार जाल्या.
हे विशीं म्हायती दितना शेतकी खात्याच्या वरिश्ठ अधिकाऱ्यान सांगलें, गोंयांत 22 ते 23 जूनाक नेमान पावस पडपाक सुरवात जातली असो अदमास आमी उक्तायिल्लो आनी तो अदमास खरो थारलो.
आतां सद्या माक्नां वरवी नांगरणी सुरू जाल्या. खाजगी, संस्था आनी सरकारी ट्रेक्टरांची पुरवण करप अजून चालू आसा. शेतां लुंवपाचें काम अजून सुरू जावंक ना, अशें अधिकाऱ्यान सांगलें.
पावसाक कळाव जाल्ल्यान शेतां बेगेनी लुंवचीं आनी शेत जमीनींची मशागत करपाक सुरवात करची अशीं एडव्हायजरी शेतकी खात्यान सगल्या शेतकारांक जारी केल्ली. हे एडवायजरी प्रमाण शेतकारांनी लुंवापा खातीर 10 दीस कळाव केलाे. जर पयलींच शेतां लुंविल्लीं जाल्यार भाताचें बी कुसपाचे, अशी म्हायती अधिकाऱ्यान दिली.
आमी धरिल्ल्या अदमासा प्रमाण पावस सुरू जालाे देखून आतां शेता लुंवप बेगिनूच सुरू जातलें. पावस आतां गोंय धरून कोंकणांत सगली कडेन पडपाक सुरवात जाल्या आनी तो एका वाठारांतच केंद्रीत ना. पावस उसरां सुरू जाल्लो आसलो तरी शेतां रोंवपाक बरी सुरवात जाल्या, अशें अधिकाऱ्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
