‘जिवोत्तम विद्यापीठ’ वैदीक शिक्षण केंद्राची स्थापणूक

भांगरभूंय | प्रतिनिधी

गोकर्ण पर्तगाळी मठाचो उपक्रम

काणकोणः प्रधानमंत्री नरेंद्र मोदी हांचे हस्तुकीं उद्घाटन जाल्ल्या 77 फूट उंचाय आशिल्ल्या प्रभू रामचंद्राच्या मुर्तीची स्थथापणूक आशिल्ल्या श्री गोकर्ण पर्तगाळी जीवोत्तम मठांत, बुधारा ‘जीवोत्तम विद्यापीठ’ ह्या नव्या वैदीक शिक्षण केंद्राची स्थथापणूक जाली. परभव संवत्सराच्या निज ज्येष्ठ शुक्ल दशमीच्या पवित्र दिसा, परमपूज्य श्रीमद् विद्याधीश तीर्थ श्रीपाद वाडेर स्वामींचे हाजिरेंत हें उद्घाटन जालें.

श्री गोकर्ण पर्तगाळी जीवोत्तम मठाची स्थपणूक 1475 वर्सा श्रीमद् नारायण तीर्थ श्रीपाद हांणी केल्ली. सुमार 550 वर्सांच्या गुरु परंपरे वरवीं मठान श्रीमद् मध्वाचार्यांच्या द्वैत दर्शनाचो प्रसार केलाे. सध्या देशांत मठाचे 34 फांटे आसात. मठांत प्रभू रामदेव वीरविठ्ठल आनी 23 गुरु परंपरेच्या आशिर्वादान त्रिकाल पुजा जाता.

शेंकड्यान शेंकडे वेद आनी शास्त्रांचो अभ्यास परंपरीक गुरुकुल पद्दतींतल्यान चालू उरला. 18 वे पट्टशिश्य श्रीमद् पूर्ण प्रज्ञा तीर्थ श्रीपाद हांणी खास गुरुकुल सुरू केल्लें, जंय सावन जायते विद्वान समाजाक मेळ्ळे. 1953 वर्सा 22 वे पट्टशिश् श्रीमद् द्वारकानाथ तीर्थ श्रीपाद हांणी गोंयांतल्या सांखळी, दिवचले हांगा ‘श्री इंदिराकांत तीर्थ संस्कृत पाठशाळा’ सुरू केल्ली. उपरांत ती कर्नाटकच्या व्यंकटापुरा हांगा हालयली, जंय संस्कृत साहित्य, व्याकरण आनी द्वैत तत्त्वज्ञानाचे शिक्षण दिलें.

1972 वर्सा 23 वे पट्टशिश्य श्रीमद् विद्याधिराज तीर्थ श्रीपाद हांणी ही संस्था पर्तगाळ हांगा हालयली आनी तिका ‘जीवोत्तम वैदीक संस्कृत पाठशाळा’ अशें नांव दिलें. 500 परस चड विद्यार्थ्यांनी थंय शिक्षण घेतलें, पूण आधुनीक शिक्षणाचो प्रभाव वाडिल्ल्यान 2016 वर्सा प्रवेश पूर्णपणान बंद जाल्ले.

सध्याच्या काळांत वैदीक अभ्यासांत नव्यान गोडी वाडिल्ल्यान, 24 वे पट्टशिश्य परमपूज्य श्रीमद् विद्याधीश तीर्थ श्रीपाद वाडेर स्वामी हांणी ‘जीवोत्तम विद्यापीठ’ ह्या नांवान ही संस्था परतून सुरू केल्या.

विद्यार्थी आनी भक्तांक मार्गदर्शन करतना, परमपूज्य स्वामी हांणी सांगलें की, हे विद्यापीठ श्रीमद् मध्व सिद्धांताच्या तत्त्वांचेर आदारीत आसतलें. 5 वर्सांच्या अभ्यासक्रमांत संस्कृत, वेद, कर्मांग आनी ज्योतिष, तर 10 वर्सांच्या अभ्यासक्रमांत संस्कृत, वेद, कर्मांग, ज्योतिष, न्याय, व्याकरण आनी वेदांताचे शिक्षण दितले.

संस्कृत विभागा खातीर श्री. गणेश भट गोकर्ण आनी श्री. रघोतम आचार्य (बेंगळुरू), वेद विभागा खातीर श्री. अथर्व भांडेकर, आनी ज्योतिष व कर्मांग विभागाचो मुखेली आनी मुख्याध्यापक म्हणून श्री. लक्ष्मीकांत भट (इडगुंजी, होन्नावर) हांची नेमणूक केल्या.

हे संस्थेचो उद्देश श्रीमद् मध्व सिद्धांताचो प्रसार करपी आनी सारस्वत समाजाची सेवा करपी विद्वान तयार करप हो आसा. हें फक्त एक शैक्षणीक केंद्र नसून, वैदीक परंपरा, मध्व तत्त्वज्ञान आनी गुरु परंपरा फुडले पिळगे मेरेन पावोवपाचें हें एक पावल आसा, अशें स्वामींनी सांगलें.

श्री हरी, गुरु आनी सरस्वती देवीच्या पुजना उपरांत, विद्यार्थ्यांक पाठ्यपुस्तकां वांटलीं आनी विद्यापिठाचें अधिकृत कामकाज सुरू जालें.

ह्या वेळार पद्मश्री पुरस्कार जैतिवंत श्री. मोहनदास पै, श्री. आर. एस. शानभाग (बेंगळुरू), मठाच्या केंद्रीय समितीचे अध्यक्ष श्री. श्रीनिवास व्ही. धेंपो, उपाध्यक्ष श्री. रामचंद्र आर. कामत, पर्तगाळ चातुर्मास्य समितीचे अध्यक्ष श्री. अनिल पै, समिती सदस्य श्री. दिनेश पै आनी श्री. योगेश कामत, विद्वान श्री. रामकृष्ण भट, पाठशाळेचे आदले विद्यार्थी, जीवोत्तम वैदीक संघाचे वांगडी, वैदीक विद्वान आनी समाजाचे लोक हाजीर आशिल्ले. ही म्हायती मठाच्या सोशल मिडिया पंगडान दिल्या.