भांगरभूंय | प्रतिनिधी
पणजी : चिखली-कोलवाळे सांज्यांवा उपरांत जाल्ले मारपेटीचे घडणुकेंत गंभीर जखमी जाल्ले कृष्णा ऊर्फ शांगो नायक (६०) हांकां उपचारा मजगतीं मरण आयलें. ह्या प्रकरणांत कोलवाळ पुलिसांनी खुनाचो गुन्यांव दाखल करून ख्रिस्तोफर पॉल (रा. चिखली) आनी प्रतीक गांवस (रा. नादोडा) हांकां अटक केल्या. जाल्यार ह्या गुन्यांवांतले हेर दोग दुबावीत फरारी आसात. पुलीस तांचो सोद घेतात.
हे विशीं मेळिल्ले चड म्हायती प्रमाण, सांज्यांव उत्सव मनोवन परततना कृष्णा नायक हांचे कडेन वाद जालो. उपरांत दुबावितांनी तांकां बरोच मारलो. ह्या हल्ल्यांत गंभीर जखमी जाल्लो कृष्णा नायक हांकां उपचारा खातीर हॉस्पिटलांत दाखल केलो. मात उपचारा वेळार तांकां मरण आयलें.
हे घडणुके उपरांत कोलवाळ पुलिसांनी (Colvale Police) तपासणी करून दोगांय दुबावितांक अटक केली. मरण आयले उपरांत ह्या प्रकरणांतल्या गुन्यांवांचें स्वरूप आनीक गंभीर जाल्ल्यान पुलिसांनी खुनाच्या कलमा खाला कारवाय सुरू केल्या. फरारी दुबावितांक पुलीस बेगीनूच धरतले, असो विस्वस पुलिसांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
