भांगरभूंय | प्रतिनिधी
मिडियेशन कार्यशाळेच्या उक्तावणा वेळार मुख्यमंत्र्याची घोशणा
तंटे सुटावे करपा खातीर सुरू केलां जनसाथी मिडिएशन केंद्र
म्हजें घर येवजणेचे जितले अर्ज येतले, ते सगळे काडटले निकालांत
भांगरभूंय । प्रतिनिधी
पणजी : गोंयांतले सगले मुंडकार, रानां हक्क दावे तशेंच म्हजें घर येवजणेचे अर्ज डिसेंबर 2026 मेरेन निकालांत काडटले, अशें मुख्यमंत्री डॉ. प्रमोद सावंत हांणी म्हणलां. म्हजें घर येवजणेचे जितले अर्ज येतले, ते सगले निकालांत काडटले, अशें तांणी सांगलें.
पणजे सारथी आयोजीत मिडियेशन कार्यशाळेच्या उक्तावणा वेळार मुख्यमंत्री उलयताले. हे कार्यावळीक महसूल सचीव संदीप जॅकीस, उत्तर गोंयचे जिल्होधिकारी अंकीत यादव आनी हेर मानेस्त हाजीर आशिल्ले. व्ही. एम. साळगांवकार कायदो म्हाविद्यालयान तंटे सुटावे करपा खातीर जनसाथी हें मिडिएशन केंद्र सुरू केलां. ह्या केंद्रा वतीन आयोजीत जागृताय कार्यावळीचें उक्तावण मुख्यमंत्री डॉ. सावंत हांचे हस्तुकीं जालें.
गोंयांत खूब वर्सां सावन कूळ आनी मुंडकार खटले प्रलंबीत आसात. हे खटले निकालांत काडपा खातीर सरकारान खासा मामलेदारां कडेन जापसालदारकी दिल्या. गरज पडल्यार सुटयेच्या दिसा लेगीत सुनावणी घेवपाचे आदेश दिल्यात. हाका लागून येता त्या डिसेंबर मेरेन सगळे खटले निकालांत येतले. तशेंच रानां हक्क दावे निकालांत काडपा खातीर जिल्हो तशेंच हेर समित्यो स्थापन जाल्यात. जिल्हो समितीची दर सप्तकांत बसका जाता. हाका लागून चडशे रानां हक्क दावे निकालांत आयल्यात. हेर प्रलंबीत दावे येता त्या डिसेंबर मेरेन सुटावे जातले, अशें तांणी सांगलें. म्हजें घर येवजणे खाला अर्ज निकालांत काडपाची प्रक्रिया चालू आसा. डिसेंबर मेरेन जितले अर्ज येतले, तितलेय अर्ज निकालांत काडटले, अशें मुख्यमंत्र्यान सांगलें.
जितले तंटे वा याचिका आसात, तातूंतल्यो 50 टक्के तरी याचिका चर्चेन वा मिडियेशनांतल्यान सुटोव्यो जावपाक जाय. अशें जालें जाल्यार न्यायालयांत प्रलंबीत आशिल्ल्या याचिकांचें प्रमाण उणें जातलें. तशेंच न्याय लेगीत बेगीन मेळप शक्य जातलें. हाका लागून साळगांवकार म्हाविद्यालयाचो हो खूब बरो उपक्रम आसा. म्हाविद्यालयाच्या फुडाकारान मिडियेशन केंद्र सुरू जावपाची देशांतली ही पयली घडणूक आसा, अशें तांणी सांगलें.
वैयक्तीक हिता परस राज्याचें हीत म्हत्वाचें
म्हजो कार्यकर्तो आसूं, वळखीचो आसूं वा सोयरो आसूं, कोणाच्याच हिताक पालव दिनासताना हांव राज्याच्या हिताक सगल्यांत चड प्राधान्य दितां. कोणूय खूब खेपे म्हाका फोन करून सांगता, मामलेदाराक मातशें सांग, हाका सांग… राज्याच्या हिताक बादा येवची ना, जाल्यारूच हांव सांगतलों, अशें हांव ताका सांगता, अशें मुख्यमंत्री डॉ. प्रमोद सावंत हांणी सांगलें. हे कार्यावळींत गोंय सरकार आनी जनसाथी मदीं समजिकायेची कबलात (एमओयू) जाली. मिडियेशना विशी जागृताय तशेंच मिडियेशन करून याचिका सुटाव्यो करपा खातीर ही कबलात आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
