भांगरभूंय | प्रतिनिधी
रमेश तवडकार : मंत्री, आमदारांनी घेतली मुख्यमंत्र्यांची भेट
भांगरभूंय । प्रतिनिधी
पणजी : येता ते वेंचणुकेंत एसटी आरक्षण लागू जातलें अशी आस्त बाळगून एसटी भावांनी पासियेंस काडलां. येता ते वेंचणुकेंत एसटीक आरक्षण मेळप शक्य जालें ना, जाल्यार आमी फुडलो विचार करतले, अशें आदिवासी कल्याण खात्याचे मंत्री रमेश तवडकार हांणी सांगलां.
मंत्री, आमदार तशेंच एसटी फुडाऱ्यांनी बुधवारा मुख्यमंत्री डॉ. प्रमोद सावंत हांची भेट घेवन एसटी आरक्षणाचे कार्यवाहीचेर चर्चा केली. केंद्रीय गृहमंत्री अमीत शहा हांचे कडेन कार्यवाहीची फांटपुरवण मुख्यमंत्र्यान करची, अशी मागणी बसकेंत जाली.
सभापती गणेश गांवकार, मंत्री रमेश तवडकार, आमदार गोविंद गावडे, आमदार आंतोन वाज, उटाचे अध्यक्ष प्रकाश वेळीप हांणी मुख्यमंत्री डॉ. प्रमोद सावंत हांची भेट घेवन चर्चा केली.
मुख्यमंत्री डॉ. प्रमोद सावंत हांच्या फुडारपणा खाला शिश्टमंडळान केंद्रीय गृहमंत्री अमीत शहा हांची भेट घेवन आरक्षणाचे कार्यवाही विशीं चर्चा केल्या. सॉलिसिटर जनरलाचो सल्लो घेवन योग्य तो निर्णय घेवपाचें आस्वासन शिश्टमंडळाक केंद्रीय गृहमंत्री अमीत शहा हांणी दिलां. सरकाराचेर विस्वास दवरून आमी सध्या पासियेंस काडलां. 2027 चे वेंचणुकेत एसटीक आरक्षण मेळटले, असो विस्वास मंत्री रमेश तवडकार हांणी बसके उपरांत उक्तायलो.
चर्चेन सगले कठीण विशय लेगीत सुटावे जातात. हाका लागून आरक्षणाचो विशय लेगीत सुटावो जातलो, अशें सभापती गांवकार हांणी बसके उपरांत सांगलें.
एसटी आरक्षणा खातीर फाटलीं 23 वर्सां आमचो लडो चालू आसा. आरक्षणा खातीर चेपण हाडपाची गरज आसा काय कितें, हें कांय दिसांनी स्पश्ट जातलें, अशें आमदार गोविंद गावडे हांणी सांगलें. एसटी आरक्षणाचे कार्यवाहीची तारीख अधिसुचीत जाले उपरांत तीन म्हयन्यांत प्रक्रिया सहज पुराय जावपाक शकता. केंद्रा कडेन फाटपुरवण करची, अशी मागणी मुख्यमंत्र्या कडेन आमी केल्या. 2027 चे वेंचणुकेंत एसटीक आरक्षण मेळपाक जाय, असो विस्वास उटाचे अध्यक्ष आनी आदले मंत्री प्रकाश वेळीप हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
