भांगरभूंय | प्रतिनिधी
फाटलीं तीन दसकां पत्रकारितेंत आसतना खबरो मेळयतना लिखाणय जालें. ताची मोलावणी हेरांनी केली, तें लिखाण फुडारांतली नदर दिवपी आसा अशें तांकां दिसलें आसतलें. तीन दसकां पंचायत ते लोकसभा वेंचणुकांचे खेळ पळयले, राजकी पक्षाचें रंग, रुपां जोखलीं. वेंचणुको लागीं येतकीच न्हिदिल्लेय जागे जातात हें हालींचें रुप. भोंवन, भोंवन पांय दुखिल्ले, हातांत कांय नाशिल्ले, पोटां भरिल्ले वाजेवन न्हिदपी आतां जल्माक येतात. तुमकां आमकां ते न्हिदल्या अशें दिसत पूण ताणीं अभ्यास कित्याक केल्लो आसचो न्ही? बारीकसाणेन अभ्यास केल्यार शेणिल्लीं मतां आनी मतदारय मेळटात. मोनीं मतांय मोलादीक आसतात. अंदूचे लोकसभा वेंचणुकेंत दिसत व्हय मोनीं मतां, मतदार?
शेणिल्लीं गोरवां करमळेच्या तळ्यांत म्हण्टात तेप्रमाण जळीं मळीं तळ्यांनी शिंपडिल्लीं सगलीं कमळां एकठांय जातलीं, सभा बसकांपासत तांची गरज आसा. गोंयांत कमळांचीं कितलींशींच तळीं आसात, लोकसभा वेंचणुकेतल्या उमेदवारांनी तीं मुद्दम वचून पळोवचीं, नितळ करपाची मोख दवरची, एकादरे तातूंतय भांगर मेळत, उदकाची पुरवणय वाडत. मोन्यां मतांचेंय तशेंच, तींय भांगराळींच.
गिमाळ्या दिसांनी उजो पेट्ट्ना चैत्रपालवीय येता. चैत्रांतलो पाडवो, चैत्रपुनव, रामनमीक मोगरीं, चाफीं, आबोलीं, रोजां, शेवतीं… फुलांच फुलां. दिवपा घेवपाकय सर्त, सादूर रावात, आशीकुशीक पळोवन फुलां घेयात. आशींकुशींनी सगल्यांचेर नदर दवरपी कॅमेरा आसात, ते रात दीस चलतात, तांकां सुटी ना, बंदय लागचो ना. त्या कॅमेरांनी अधिकारी कशे घुस्पतात? वाचप ना, मुखार कितें आसा तें दिसप ना, एकामेकांकडेन उलोवप ना अशी तांची अवस्था आसा? फकत सोशल मिडीयाक ते धरून आसात? बरें वायट चिंतपी, विचार करपाची तांक आसपी जाय. मोन्यांनी रावप, दुसऱ्यांचे आयकून घेवप, प्रस्न विचारपांत, उतरांनी परगटावपांत व्हडपण आसा, तातूंतल्यान फुडारय कळटा, मोनीं मतां तींच.
खंय आसात मोनी मतां, मतदार ? मात्शें चलल्यार, भोंवल्यार, मतदार वळेऱ्यो तपासल्यार कोनशा कोनशांनी तीं मेळटलींच. एकादरे हेवटेन तेवटेन जाल्लींय दिसतलीं, पर्वरेच्यान पणजे आनी कुठ्ठाळेसावन बाणावलेय तीं पावल्यां आसतलीं. जशे गोंयाभायले मतदार ह्या राज्यांतल्यान त्या राज्यांत राबित्याक वतात तशेच गोंयकारय आपलो राबितो बदलतात. हातूंतल्यान मतदारांचो मतदारसंघ बदलिल्लो आसत, नासत, मतदान केंद्रांतय बदल जाल्यात. मोने मतदार, मतांय तांचेभितर मेळटले. सगलेच मतदार उलोवपी, आपले विचार परगटावपी आसचे नात. मोन्यांनी, कोणाक कळचें ना अशेंय मतदान जावपाक जाय अशीं गणितां मांडपी, सगल्या राजकी पक्षावाटेन भोंवपीय आसतले. आदलेवरी मतदार स्लिप पावोवपाक जाय अशें ना ती नासल्यारय जाता, मतदान केंद्रांनी वळखपत्र दाखयल्यार वा मतदान केंद्रांनी कंप्युटरार पळयल्यार मतदारांक मतदानाचो मार्ग कळटा. मतदार वळेऱ्यो मतदारांक कंप्युटरार, मोबायलार पळोवपाक मेळटात. एकच गजाल करात ती फुडें वता तेन्ना तिचेर रागार जावचें न्हय. मतदारां मुखार वचपाची तांक तिकाय आसा. नवो, नवी आसल्यार वेंचून येवन लोकसभेंत ती, तो इनामाय जोडूंक शकता, मोन्यां मतदारांच्या बळग्यार, उच्च शिक्षणाच्या आदारान.
चैत्रांतल्या पाडव्या मागीर शुक्रार 12 एप्रिलाक गोंयांत जावपी लोकसभा वेंचणुकेची अधिसुचोवणी काडटले. तेच दिसा उमेदवारी अर्जय घेवपाक आरंब जातलो, सप्तकभर उमेदवारी अर्ज भरपाक वतना आचारसंहिता पाळात, गर्दी
करुंक नाकात, उबाळाचे दीस आसात हें विसरचें न्हय. उमेदवारीचो वावर सोपतकीच वेंचणूक आचारसंहिता खरे अर्थान सुरू जाता.
मोने मतदार उमेदवारी भरपावेळार, प्रचारावेळार नासतले व्हय? आसतलेच तांकां सोदून काडप सोपें न्ही पूण सोदल्यार तेय मेळटलेच, जाय राजकी इत्साशक्ती. धपक्यार धपके दिवपी अंदूचे लोकसभा वेंचणुकेतले राजकारण मोन्यां मतदारांक आनीक मोने करतलें. नाकाच तें मतदान अशेंय दिसतलें पूण तांकांय पर्याय आसा “नोटा”, नोट न्ही. पर्याय आपणावप, ना आपणावप हें मतदारांनी थारावप, निमाणे मतदारच राजा, मोन्यां मतां सयत.
उमेदवारांक दर एकल्या मतदारांक मेळूंक मेळटलें अशें न्हय पूण तांच्या, राजकी पक्षांच्या कार्यालयांमेरेन तुमचे विचार पावोवपाची संद घेवची. तोडफोड, मोडतोड नाका, लुकसाणय नाका. पयसो मोलादीक, मोन्यां मतावरींच.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
