‘मनी, मसल, मशीन’

भांगरभूंय | प्रतिनिधी

लोकशाय कितें तें? ह्या माथाळ्याचीं पयलींचे आय ए एस अधिकारी अरविंद भाटीकार हांचीं दोन पुस्तकां हालींच प्रसिद्ध जाल्यांत. 50 वें विखुरील्लें पान बरयतना ह्या पुस्तका विशीं सांगचेंशें दिसता. पुस्तकांनी वेंचणूक, राजकारण, प्रशासन दिसता. आदले संरक्षण मंत्री मनोहर पर्रीकार, पयलींचे मुख्यमंत्री प्रतापसिंह राणे, लक्ष्मीकांत पार्सेकार आनी अंदुंचे लोकसभा वेंचणुकेंतलें उत्तर गोंयचे उमेदवार रमाकांत खलप, हेर राजकारण्यां विशीं पुस्तकांत म्हायती आसा. राजकी फुडाऱ्यांचे सभाव समजून, तांचीं भाशणां आयकून केल्लें लिखाण, परगटायिल्ले विचार पुस्तकांतल्या पानांनी लिपल्यात. साड्यो, पयशे, सोरो, बिर्याणी वेंचणुकांनी पावतकीच जाल्ले आरोप, त्या आरोपांक दिल्ल्यो जापो आनी अरविंदबाबान मारिल्लें फोण्ण पुस्तकाचें खाशेलपण. नाटक ना, सत वा खरेंपणा लागीं पावपाचे ताणीं केल्ले येत्न ओंठार हांशें हाडपी. राजकारण्यांच्या पोटांत कितें शिजता तें अरविंदबाबाक होल्मलें ना अशें न्ही. तांचें लिखाण आपल्या विचारांची जोड दिवपी, फुडार सांगपी. भौशीक व्यवस्थेंत, कायद्यांनी बदल जावपाक जाय हे विशीं ताणीं धा- बारा वर्सांआदीं पुस्तकांत मांडिल्ल्या विचारां प्रमाण बदलय जाल्यात. अरविंदबाबांचे जैत तांच्या पुस्तकांतल्या विचारांनी आसपावलां.
आयज वेंचणूक म्हळ्ळ्यार पयसो, वेंचणुकांनी ‘मनी, मसल, मशीन’ आसा हें तरणाट्यांचें मत. काल ते बिलूबाय आशिल्ले आयज ते संवणें, फाल्यांचे ते वाग आनी शींव. अरविंदबाबांची हीं गणितां. नाका रे बाबा वाग, शींव अशें म्हणत फट, फटींग, फटींगपणांचो इतिहास आडवाटेन सांगपी फकाणेरय आयज भाऊंची तोखणाय करतले. दोतोर, उद्येगपती न्ही तरी वेवसाय, वेव्हारांत घुस्पल्ले ते सगल्यांचे भाऊ. माध्यमांचो खेळ तांकांय भुल्लुसावपी पूण चार हात पयस रावपाचें शाणपण आयलें तरी तांकांय उलोवचेशें दिसता, स्लिप ऑफ टंग जावंक शकता. राजकारणांतल्या अणभवांतल्यान अंदूं वेंचणुकेंत देंवतना पयलो धपको बसतकीच तांणी अपघाता विशीं सांगून सोडलें, चूक मागून.
पूत सिद्धेश राजकारणांत वेंचून येवन फुडें आमदार, मंत्री जावंक सोदता, आपूण जाण्टो जातां हें भाऊंक खबर आसा. तातूंतल्यान ही म्हजी निमणी वेंचणूक अशेंय सांगून ते मेकळे. वेंचणुकेवेळार भोंवतना आदले मुखेलमंत्री मनोहर पर्रीकार, पयलींचे मुखेलमंत्री लक्ष्मीकांत पार्सेकार, इश्ट माधव धोंड हांची तांकां याद येतली.
पंचवीस वर्सांनी लोकसभा वेंचणुकेच्या मैदानात देंवपी पयलींचे केंद्रीय कायदोमंत्री भाई खलप हांचे बराबर 25 वर्सांआदीं आशिल्ले म्हापशेंकार अजित मांद्रेकार आज भाऊ वांगडा भोंवतात. भाऊ विरुद्ध भाई अशें झुज जातना ‘मनी, मसल, मशिन’ च्यो गजाली आयकूंक येतल्यो. अजित खंय रे तूं, कितें चल्लां, साडयो, वॉशिंग मशिनां वाटपाक कोण गेल्यात? मोपा विमानतळा लागीं आमच्यो जमनी आसात त्यो कोणे व्हरुंक ना मरे, कसो चल्ला भाऊचो प्रचार अशें भाई विचारतलेच.
कितें चललां रे भाऊ, भाईचें? बी फॉर्म मेळ्ळो अमृत महोत्सवी भाईंक? अभिमन्यू जावन चक्रव्यूह फोडपाची येवजण बांदपी खंय गेले? ही चिंतना अजिताचीं.
पणजेकार भाऊ आनी म्हापशेंकार भाई खलप हांच्या फाटल्यान बॅगो सॉरी ब्रिफकेसी घेवन शेंकड्यांनी आसतले. रित्यो बॅगोय आसतल्यो, येतना रित्या हातांनी, वतनाय रित्या हातांनी अशा विचारांच्यो.
विचारधन दिवपी जेन्ना लिकरगेटींनी लिपतात तेन्ना म्हजो गांव जाणटो जाता हें सत फकाणां मारीत सांगपी नाटकांय येतात.
भाई खलप गोंयचे आदले उपमुख्यमंत्री, केंद्रीय कायदोमंत्री, ते विद्वान, गोंय विधानसभेचे खडेगांठ विरोधी पक्ष मुखेली आशिल्ले हें विसरुंक जायना. तांकां काँग्रेसीची उमेदवारी जाहीर जाली, उतरांचो शिंवर हे वटेन, ते वटेनय जावपाक लागला. भासाभास करतना भाई सपन पळोवंक लागल्यात, संसदेत विरोधी पक्ष मुखेली जावपाचें.
काँग्रेस विरोधांत आसतली हें ताणीं धिटायेन सांगलां.
वेंचणुकेंतल्या ‘मनी, मसल, मशिन’ च्यो खबरी विमान, जग्वारा मेरेनय पावल्यात. चंद्रा वयली भूंय इस्त्रोचें गगनयान भारत भूंये वेल्यान सोदता तेन्ना भाऊ केंद्रीय मंत्र्यांचें रांकेंत कित्याक आसचे नात?
पोटले घेवन येवपी, पोटले व्हरपी शेंकड्यांनी, पोटले सोडपी साठ टक्क्यां मेरेन आसतले. त्या साठ टक्क्यां भितर मोनीं (सायलंट) मतां चाळीस टक्के. रस्त्यार भोंवतना कॅमेरा, वडा पोंदा विसव घेतना झाडार कॅमेरा, घरांतय कॅमेरा, मळबांत ड्रोन. मनी, मशिनां दवरप ट्रकांनी भाजी, फळांच्या? चित्र ताचे परस व्हड. साहित्यांतल्या वझऱ्यांतय तें दिसतलें, भाऊंच्या न्ही भाईंच्या. साहित्या कडेन फाटलीं दोन वर्सां भाईंची लागणूक वाडपांत वेंचणुकेचें राजकारण आशिल्लेंच. फाटलीं पंचवीस वर्सांय ते राजकारणातच, केन्ना कार्यकर्ते, केन्ना प्रवक्ते, केन्ना आंदोलक.

सुहासिनी प्रभुगांवकार
9881099260