भांगरभूंय | प्रतिनिधी
नगराध्यक्ष शिरोडकार : आमदार कामत हांचे वांगडा केली चर्चा
मडगांव, प्रतिनिधी : मडगांवां पालिकेंत वट्ट 43 पदां भरपा खातीर जायरात काडिल्ली. ही पदां नगरविकास संचालनालय वा कर्मचारी भरती आयोगा वरवीं भरतले, अशें सांगून सरकारान तीं रद्द करपा खातीर निर्देश दिल्ले. हे संबंदी आमदार कामत हांचे कडेन चर्चा केल्या. तो आदेश फाटीं घेवन भरती करपाक सुरवात करतले, अशें नगराध्यक्ष दामोदर शिरोडकार हांणी स्पश्ट केलें.
पालिकेचे अभियंते हांव आनी आमदार कामत हांचे मदीं फूट घालपाचो यत्न करतात हें आपणेंय आयकलां. आयच्यान पालिकेंत आपल्या कामाची पद्दतूय वेगळी आसतली. ह्यान पयलीं पांच लाखांचें बील फारीक करतना एमबी आनी व्हाउचराचेर कोणें वायट नदर दवरल्या हेंय आपल्याक खबर आसा. कांय गजाली सोडोवपाक वेळ लागतलो. पूण योग्य वेळार कारवाय जातली, अशेंय शिरोडकार हांणी म्हणलें.
फाटल्या 17 वर्सां सावन आडखळून उरिल्लीं कर्मचार्यांचीं प्रमोशनां साडेतीन म्हयने यत्न करून मार्गाक लायल्यांत. दरेका विभागांत सकाळीं आठ वरांचेर उपलब्ध जावपी कामगारां परस चड कामगार उपलब्ध करून दिले. हें सगळें फाटल्या धा म्हयन्यांच्या काळांत जाल्ल्याची भावना नगराध्यक्ष शिरोडकार हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
