भांगरभूंय | प्रतिनिधी
हेर देशांनी तांदळाच्या मोलांत व्हड प्रमाणांत वाड
नवी दिल्ली, खबरां संस्था: संवसारभर म्हारगायेक लागून रांदचे कुडीचें अर्थसंकल्प इबाडलां. मजगतीं फाटल्या कांय दिसां सावन भारतान तांदळाचे निर्यातीचेर बंदी घालून संवसारांत बोवाळ निर्माण जाला. जायत्या देशांनी तांदळाच्या मोलांत व्हड प्रमाणांत वाड जाल्ल्याचें दिसून आयलां.
भारतान फाटल्या सप्तकांत परबोल्ड आनी बासमती तांदळाचेर निर्बंध घातिल्ल्यान आशियांत तांदळाचें मोल बरेंच वाडलें. तांदूळ आनी हेर कांय कड्डणांचेर 20 जुलय सावन बंदी सुरू जाली. ताचे उपरांत तांदळाच्या जायत्या जातींच्या निर्यातीचेर बंदी घातली. भारत हो संवसारांत सगळ्यांत चड तांदूळ निर्यात करपी देशां मदलो एक देश. ताचे उपरांत थायलंड, व्हिएतनाम सारके देश आसात.
संवसाराक तांदळाचो हुस्को कित्याक?
हार्वर्ड विद्यापिठाचो प्राध्यापक एमेरिटस पीटर टिमर हांणी सांगलें, तांदळाच्या दरांत वाड जाल्ल्यान चड करून गरीब गिरायकांक चड त्रास जाता. सध्या सगळ्यांत व्हडलो हुस्को म्हणल्यार थायलंड आनी व्हिएतनाम हांणीय जर भारता वरीं तांदळाचेर निर्बंध घातल्यार संवसारभर तांदळाचें मोल 1000 डॉलर परस चड जावंक शकता अशें तांणी सांगलें.
आतां तांदळाचें मोल कितलें आसा?
संवसारीक बाजारांत तांदळाचें बेंचमार्क मोल सध्या प्रती टनाक ६४६ डॉलर आसा आनी पावस उणो पडल्यार तें आनीक वाडूंक शकता. थायलंडान हे खेपे दुकळाची शिटकावणी दिल्या, ताका लागून संवसारीक बाजारांत तांदळाचें मोल वाडपाचो भंय आनीक वाडला. सध्या चिनांतलें पीक बरें आसा आनी संवसाराक हांगच्यान सुटका मेळूंक येता.
भारतान कित्याक बंदी घाली?
देशांतल्या तांदळाचो दर फाटल्या वर्सा परस वाडला. नवी दिल्लींत एक किलो तांदळाचो खर्च 39 रुपया आसा. अशे परिस्थितींत तांदळाच्या वाडट्या मोलाक लागून निर्यात कर एक तर वाडयला वा ताचेर बंदी घाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
