भांगरभूंय | प्रतिनिधी
ग्रामस्थांनी परतून लायलो रोंपो
वाळपय: नगरगांव ग्रामपंचायत वाठारांतल्या ब्रह्मकरमळे ब्रह्मदेव देवस्थानाच्या प्रांगणांत फाटल्या तीन पिळग्या सावन इतिहासाची साक्ष दिवपी वटवृक्ष कांय दिसां पलयीं मातयेभरवण जालो. हाका लागून परतून एकदां तेच सुवातेर वटवृक्षाची निर्मिती करपाचें इतिहासीक पावल ब्रह्मकरमळी वाठारांतल्या ग्रामस्थांनी उबारलें काल (आयतारा) वटवृक्षाच्या झाडाचो रोंपो परतून लायलो. ब्रह्मकरमळी गांवच्या इतिहासांत हो दीस नोंद करपा सारको आसा.
दरेक ग्रामस्थांनी ह्या वटवृक्षाचो सांबाळ करून फुडारांतले पिळगेक बरी प्राणवाय निर्माण करपाच्या प्रवाहांत वांटेकार जावपाचें आवाहन ग्रामस्था वतीन केलें. देवस्थानाच्या प्रांगणांत शास्त्रोक्त आनी धर्मीक पद्दतीन ह्या झाडाचो रोंप लायलो. देवस्थानाचे पुरयत संदीप केळकार हांणी मंत्रोच्चार करून झाडाच्या रोंपणाक विशेश म्हत्व प्राप्त करून दिलें.
ह्या वेळार नगरगांव पंचायतीचे सरपंच तशेंच गांवचे ग्रामस्थ संध्या खाडीलकार, समाजकार्यकर्ते प्रसाद खाडीलकार, मिलिंद गाडगीळ, अॅड. शिवाजी देसाय देवस्थानचे पदाधिकारी, ग्रामस्थ व्हड संख्येन हाजीर आशिल्ले.
ह्या वेळार सरपंच संध्या खाडीलकार हांणी सांगलें, फाटल्या 300 वर्सां सावन ह्या वाठारांत वटवृक्षाच्या माध्यमांतल्यान गांवचो सैमीक, पर्यावरणीय, शास्त्रोक्त, धर्मीक, अर्धयात्मीक कार्याक चालना दिल्ली. नेटाच्या वाऱ्याक लागून वटवृक्ष मातयेभरवण जालो. हाका लागून खूबशा ग्रमस्थांच्यो यादी ह्या वटवृक्षाच्या माध्यमांतल्यान परतून एकदां जिव्यो जाल्यो. 300 वर्सांचो इतिहास सांगपी वटवृक्ष मातयेभरवण जालो. तरी लेगीत खूबशा लोकांच्यो यादी आयजूय जिव्यो उरल्यात. तेच सुवातेर परतून एकदां वटवृक्षाची निर्मिती जावची हे खातीर ग्रामस्थांची बसका जावन ताचे रोंपण करपाचें निश्चीत केलें. आयज सगल्या ग्रामस्थांचे साक्षेन वटवृक्षाचें रोंपण केलें. हाका लागून ह्या गांवा खातीर आयचो दीस हो इतिहासीक स्वरुपांत म्हत्वाचो आशिल्ल्याचें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
