भांगरभूंय | प्रतिनिधी
पणजी : बाणस्तारी अपघाताक आयज दनपरां एक नवें मोडण मेळ्ळां. आम आदमी पक्षाचे फुडारी अॅड. अमित पालेकार हांकां गुन्यांव फांट्यान अटक केल्या.
तांणी अपघाताक जापसालदार थारिल्ले मर्सिडीज बॅन्झ गाडयेचो ड्रायव्हर परेश सिनाय सांवड्डेंकार हाका वांटावपा भलत्याच एका तरणाट्याक ड्रायव्हर म्हूण म्हाड्डोळ पुलीस स्टेशनाचेर व्हेलो, अशें कळिल्ल्यान गुन्यांव फांट्यान ही कारवाय केल्या. अॅड. पालेकार हे गोंयांतले एक नावाजते वकील. कांय म्हयन्यां पयली ते आम आदमी पक्षान गेल्ले. अरविंद केजरीवाल हांणी तांकां मुख्यमंत्री पदाचेर उमेदवार म्हूण घोशीत केल्ले. ताका लागून तांचे अटकेची बातमी राज्या वांगडा, राष्ट्रीय पांवड्याचेरुय गाजपाक शकता.
बाणस्तारी अपघात जावचे पयलीं सावर्डेंकार कुटूंब जे पार्टेक गेल्लें तिचोय एक फोटो सोशल मिडियाचेर खूब व्हायरल जाल्लो. तांतूंत कांय कुटुंबां सयत अमित पालेकार दिसतात. तो फोटो व्हायरल केल्ले खातीर अॅड. पालेकार हांणी उपरांत भाजपाच्या आयटी विभागाचेर टिकाय केल्ली.
भलत्याकूच ड्रायव्हर म्हूण दाखोवपाचो यत्न जाला अशें कानार आयिल्ल्यान हे विशीं चवकशी करपाक पुलिसांच्या गुन्यांव फांट्यान पालेकार हांकां आपयिल्ले. चवकशे उपरांत तांकां वयल्या दुबावा वयल्यान गुन्यांव फांट्यान अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
