भांगरभूंय | प्रतिनिधी
पेडणें, निवृत्ती शिरोडकार हांचे कडल्यान : मांद्रेंच्या देवूळवाड्यार रमेश शेठ मांद्रेंकार आनी ताचें कुटूंब फाटलीं सुमार देडशीं वर्सां सावन गणपतीची चित्र शाळा चलयतात. ह्या काळांत हजारांनी भौशीक आनी घरच्या गणेश मुर्तींचो केल्यात. पूण आजून पसून एकूय प्लास्टर ऑफ पॅरिस मूर्त विक्री खातीर दवरूंक ना. पेडणें म्हाल आनी राज्यांतली ही एकूच चित्र शाळा आसूं येता जातूंत प्लास्टीक ऑफ पॅरीसांच्या गणेश मुर्ती तशेंच हेर मुर्तींक सुवात ना. मातयेन हात घालून, मातयेक आकार दिवन, मुर्तींत कलाविष्कार दाखोवपाची किमया फकत मातयेच्या कामांतूच दाखोवं येता, अशें मत मुर्तीकार रमेश शेट मांद्रेंकार हांणी उक्तायलें.
रमेश शेट मांद्रेंकार हांचें पुराय कुटूंब फकत दोंगराळ माती वापरता. मनीसबळ मेळना म्हणून ते दर वर्सा मुर्ती तयार करपा खातीर भायल्या राज्यांतल्यान अणभव आशिल्ले शिल्पकार हाडटात. माद्रेंकार हे आपले कला शाळेंत दर वर्सा हजारभर मुर्ती तयार करतना दिसता. तांच्या मुर्तींक पुराय राज्यांत मागणी आसा.
प्लास्टर ऑफ पॅरीस मुर्त्यांचेर बंदी घालपाची आसल्यार सगल्यांनी एकवटान निर्णय घेवचो. आमी फकत मातयेच्या मुर्तींची पुजा करतले आनी पर्यावरण वाचयतले. पॅरिसाच्यो प्लास्टराच्यो मुर्ती ल्हव आनी सोबीत जरी आसल्यो तरी ताचो पर्यावरणाचेर कसो परिणाम जाता तें आमी पळयतातूच. सरकार आनी हस्तकला म्हामंडळाचे अधिकारी तांचेर योग्य कारवाय कित्याक करिनात असो प्रस्न रमेश शेठ मांद्रेंकार हांणी उक्तावन प्लास्टर ऑफ पॅरीस मुर्तीचेर पुरायेन बंदी हाडपाची तांक सरकारा कडेन आसा. हे खातीर नागरिकांनी आनी गणेशभक्तांनी सरकाराक तेंको दिवचो अशें तांणी फुडें म्हणलें.
दर वर्सा सरकार प्लास्टर ऑफ पॅरिसाच्या पुतळ्यांचेर बंदी घालपाची घोशणा करता. ही घोशणा सध्या हवेंत आसा. ते खातीर शाळांनी गणपतीच्यो मुर्त्यो तपासपाक वचपी अधिकार्यांक खंयची मूर्त माती आनी खंयची प्लास्टर ऑफ पॅरीस हें कळपाक जाय. संबंदीत अधिकारी दोळे धांपून मुर्त्यांची तपासणी करतात काय कितें? जर दरेके कला शाळेंत प्लास्टर ऑफ पॅरिसाच्यो मुर्त्यो मेळटात जाल्यार मागीर अनुदान कोणाक दिवचें? अशे प्रस्न विचारून अधिकार्यान पयलीं प्लास्टर ऑफ पॅरीस आनी चिकण मातये मदल्या फरकाची निस्वार्थीपणान तपासणी करची अशेंय रमेश शेठ मांद्रेंकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
