‘पाळी’ आनी ‘गुरवारपणाचे’ धडे डॉ. गूगल अचूक दिवंक शकना : डॉ. रेवा दुभाषी

भांगरभूंय | प्रतिनिधी

पाळी आनी गुरवारपण हे विशीं लोकां मदीं वेगवेगळे तरेचे विचार आनी समजुती आसतात. पूण ते विशीं वॉट्सअॅपाचे वा सोशल मिडिया वयल्यान शिकून आयिल्ले व्यक्ती कडल्यान गिन्यान मेळयल्यार तें घातक थारूं येता. हे खातीर अशा विशयांचेर स्त्रीरोगतज्ञांकूच उलोवंक दिवप गरजेचें. तातूंत जर स्त्रीरोगतज्ञानूच अशा विशयाचेर पुस्तक बरयल्यार ताचो लाव समाजाक जावंक शकता आनी असो लाव करून दिवंक नामनेची स्त्रीरोगतज्ञ डॉ. रेवा दुभाषी हांणी आपलें ‘पाळी आणि बरेच काही’ हें पुस्तक प्रसिद्ध केलां. तातूंत तांणी डॉ. गूगल, सोशल मिडिया आणि आरोग्य ह्या विशयांचेरय आपलें खर मत मांडलां. हांसत्या मुखामखा मळान दुयेंतींक तपासतना डॉ. दुभाषी त्या वेळा वयले वेंचीक अणभवूय मोबायलाचेर बरोवन दवरता आनी आपल्या बरोवपाच्या गुणाक उर्बा दिता. भुरगेपणांत कथक नाच आनी अभिनया खातीर पुरस्कार घेवपी ही साहित्यिक समाजीक मळारूय वावुरता. हे विशीं चैत्रा बोरकार हांणी तांचे कडेन संवाद सादलो: –

तुमचें हालींच ‘पाळी आणि बरेच काही’ हें पुस्तक उजावाडाक आयलां. हें पुस्तक कित्याक लागून बरोवंक दिसलें आनी महिलां खातीर नेमको संदेश कितें आसा?
गुरवार महिलां मदीं ज्यो गैरसमजुती आसतात, त्यो हांव तांचे कडेन संवाद सादून पयस करपाक शकतां. पूण तीं क्लिनीकांतल्यान घरा पावलीं म्हणटकच तांकां घरचीं वा हेर लोक वेगळेंच कितें तरी सांगतात. देखीक: एके गुरवार महिलेन म्हाका विचारलें की काळींग खाल्यार जाता काय म्हूण, तेन्ना हांवें तिका हय म्हूण सांगलें. पूण घरचीं तिका सांगतात नाका म्हूण. जे चड लोक तांकां सांगतात तांचो तांचेर परिणाम जाता आनी गुरवार महिला दोतोराचे सोडून तांचेंच आयकतात. हे खातीर हाचें डॉक्युमॅन्टेशन जावंक जाय अशें म्हाका दिसतालें आनी ते खातीर हें पुस्तक बरोवचें अशें दिसलें. हांवें जें कितें पुस्तकांत बरयलां ताची म्हायती गूगलाचेर मेळची ना. हे खातीर महिलांनी ती वाच्ची आनी स्वताची जागृताय करून घेवची इतलीच आशा
महिला आपले भलायके विशीं कितली गंभीर आसता अशें दिसता?
कांय महिलांक एक तर पूत जाय आसता आनी दुसरें म्हणल्यार सणांच्या दिसांनी तांकां पाळी आयिल्ली नाका आसता. अशा महिलांक आपल्या भलायकेचें पडून वचना. ते खातीर तांणी जागृताय करून घेवप गरजेचें. सादेपणान आपले भलायकेचें वेवस्थापन करूं येता. भलायकी बरी उरपाक कितें खावप आनी कितलें उदक पिवप हाचें गिन्यान आसपाक जाय. अशा वेळार घरकारानूय आपले घरकान्नीक सहकार्य करप गरजेचें आसता. तिच्या भावनीक विश्वाची कदर करून तिका मदत करप हें चड म्हत्वाचें आसा.
स्त्रीरोगतज्ञ ह्या नात्यान आपलें योगदान दितना तुमकां पिडेस्तांचेर उपचार करतना खंयच्या आव्हानांक तोंड दिवचें पडटा?
गुरवार महिलांच्यो गैरसमजुती पयस करपाक आमचो खूब वेळ वता. तशेंच लोक आपल्या दुयेंसाचें निदान कशें करप हें गूगलाचेर सोदतात आनी वॉटसअॅपा वयल्यो गजाली आयकून हुस्क्यांत पडटात. आपल्याक ही अमूक गुळी दिल्या ती अमूक दुयेंसाची ती म्हाका कित्याक दिल्या अशेंय विचारपी लोक आसात. पूण ती गुळी वेगवेगळ्या उपचारांक वापरतात हें तांकां खबरच आसना. इंटरनेटाचेर कोण कसलीय म्हायती घालतात. ती सारकी आसताच अशें ना. हे खातीर अशा गजालींचो त्रास जाता. लोक आमचे कडेन येवचे आदींच गुगलाचेर सोद लावन आपल्याक कितें जालां तें पळयतात. गुगला वयल्यान जें बरें मेळटा तें घेवचेंच, पूण चुकीचे म्हायतीक बळी पडूंक जायना. आतां हांगांय एक प्रस्न उप्रासता, तो म्हणल्यार दिल्या ती म्हायती चूक काय अचूक हें कोणें थारावप. ते खातीर योग्य व्यक्ती कडेनच संपर्क करचो पडटा.
साहित्य बरोवपाक तुमकां कोणें उर्बा दिली आनी सगळ्यांत पयलीं तुमी साहित्यांतलो खंयचो प्रकार बरयिल्लो?
ल्हानपणासावन पुस्तकां वाचपाची उमेद आशिल्ली. तेन्ना पुस्तकां शिवाय आमचे कडेन आनीक कसलेंच मनरिजवणेचें माध्यम नाशिल्लें. आमच्या घरांत पुस्तकांय खूब आशिल्लीं. हे खातीर वाचता वाचता म्हाका बरयन दिसलें आनी विद्यालयांत आसतना निबंद बरोवपाक सुरुवात केल्ली, म्हजे हे आवडीन म्हाका आयज हांगां मेरेन हाडलां. म्हाका ललित बरोवपाक खूब आवडटा. तें म्हाका सदांच बरोवपाक आवडटलें.
तुमचें हें पुस्तक फाटल्या कितल्या वर्सांच्या अणभवांचें कथन करता?
हांवें आवयपणाचो अणभव घेतलो तेन्ना म्हाका दिसलें की ह्या विशयाचेर एक पुस्तक बरोवपाक जाय आनी लोकांक म्हायती दिवंक जाय. हांव जरी स्त्रीरोगतज्ञ आसलें तरीय, आवयपणाचे भुमिकेंतल्यान वतना जीण खूब कितें शिकयता. विदेशी वैजकी पुस्तकांत भारतीय मानसिकतेचो, आनी जीणेशैलीचो तसो विचार जावंक ना. हे खातीर हें बरोवप गरजेचें आशिल्लें. ह्या पुस्तकांत फाटल्या 15 वर्सांचे अणभव आसात.
लेखक पुस्तकां छापतात, पूण वाचक वर्ग उणो जाला अशें तुमकां दिसना? दिसता जाल्यार वाचक वर्ग वाडोवपाक कितें करूंक जाय अशें दिसता?
म्हज्या ह्या नव्या पुस्तकाक आतां मेरेन लोकां कडल्यान बरो प्रतिसाद मेळपाक लागला. सोशल मिडियाच्या माध्यमांतल्या आयज पुस्तक विक्री करपाक बऱ्याक पडटा अशें म्हाका दिसता. पूण लोकांक दर्जो आशिल्लें साहित्य दिवप गरजेचें, तेन्नाच वाचकवर्ग वाडटलो. वाचकांक वाचना कडेन ओडपाक आमकां बऱ्या दर्जाचें पुस्तक दिवचें पडटलें. आपूण बरयता तें सगळेंच बरें आसता अशें ना, ते खातीर आपलें साहित्य गाळून बरें आसा तें लोकांक दिवंक जाय. तशेंच मार्केटिंगय बरें जावंक जाय.
साहित्य बरोवपाक तुमी वेळ कसो काडटात?
म्हाका वेळ मेळना. पूण बरयले बगर हांव रावूंक शकना. हांव जंय वेळ मेळटा थंय मोबयलाचेरच बरयतां. तें मागीर हॉस्पिटलांत आसू वा आनीक खंयूय. आवड आसली जाल्यार वेळ काडप जाता.
तुमच्या ‘आबोलेची वेणी’ ह्या निबंदांत हिंदू आनी क्रिस्तावांची संस्कृताय आयल्या. ते विशीं सांगशात?
हो निबंद खूब लोकांक आवडलो. म्हाका मनांतल्यान दिसलें की हें बरें करून बरोवचें. चिंबला म्हजें भुरगेपण गेलां. सरभोंवतणी सगळे क्रिस्तांव लोक आशिल्ले. ते आमचे कडेन खूब बरे भशेन वागताले. आमच्या भाटांत खुरीस आसा आनीक आमी तो तसोच दवरला. आमी थंय मेणवाती बी लायतात. थंय वर्साक लादेन जाता. आमचे श्रीचिमुलकान्नीची पालखी येता तेन्ना क्रिस्तांव लोक आबोलेचे झेले घेवन येताले. फळां घेवन येताले. हें सगळें चित्रण म्हज्या ह्या निबंदांत आयलां. ह्या निबंदांत आमचो गोंयचो एकचार दिसता…
तुमचें दोनूय मळा वयल्या समाजा खातीरच्या योगदाना खातीर घरच्यांचो तेंको कितलो मेळटा?
घरच्यांचो तेंको आसले बगर हें जावंकच शकना. म्हजो घरकार डॉ. सर्वेश दुभाषी हे म्हाका खूब तेंको दितात. तशेंच म्हजी धूव लेगीत म्हाका हे खातीर खूब सहकार्य करता. हांव वैजकी मळा वयलें फुडलें शिक्षण घेवंक केरळांत गेल्लें तेन्ना म्हजी माय आनी मांव लेगीत येवन म्हज्या वांगडा रावल्यांत. हे खातीर म्हाका दिसता मुखार सरतलो आनी येस मेळयतलो जाल्यार घरच्यांचो तेंको जायच.
तुमी आदीं महाविद्यालयां, उद्योगीक वसणुकांनी महिलांक व्याख्यानां दिल्यांत, ताचो समाजीक नदरेंतल्यान तुमकां लाव जालो?
हय! म्हाका दिसता आमचे कडेन जें गिन्यान आसा, तें आमी दुसऱ्यांक दिवंक जाय आनी जागृताय करपाक जाय. हें करतना म्हाकाय समाजाचीं वेगवेगळीं तासां पळोवंक मेळ्ळीं. तातूंतल्यान शिकपाक मेळ्ळें आनी हे खीण आयज म्हज्या लिखाणांत येतात.