भांगरभूंय | प्रतिनिधी
उत्तरेंत मगोक सगळ्यांत चड 6 खेपे, जाल्यार दक्षिणेंत काँग्रेसीक 10 खेपे जैत
पणजी, प्रतिनिधी ः लोकसभा वेंचणुकेंच्या तिसऱ्या पावंड्यार गोंयच्या 2 मतदारसंघां खातीर मतदान जातलें. गोंय मुक्त जाल्या उपरांत उत्तर गोंयां खातीर जावपी ही सोळावी जाल्यार दक्षीण गोंयां खातीर जावपी सतरावी वेंचणूक आसा. आतां मेरेन उत्तर आनी दक्षीण मेळोवन मगो पक्षा वतीन सगळ्यात चड 7 जाण खासदार जाल्यात. दक्षीण गोंय मतदारसंघा खातीर 2007 वर्सा पोटवेंचणूक जाल्या. हाका लागून दक्षीण गोंयांत उत्तरे परस लोकसभा वेंचणुकेंचो आंकडो एकान वाडला.
उत्तर गोंयांत आतां मेरेन जाल्ल्या 15 लोकसभा वेंचणुके मदल्या सगळ्यात चड 6 खेपे मगोन जैत मेळयला. मगो उपरांत भाजपान 5 खेपे जाल्यार काँग्रेसीन 4 खेपे जैत मेळयला. दक्षीण गोंयचो विचार केलो जाल्यार काँग्रेसीन सगळ्यात चड 10 खेपे जैत मेळयला. युगो आनी भाजपान दरेकी 2 खेपे जाल्यार मगो आनी युगोडेपान दरेकी एकदा जैत मेळयलां.
तशेंच उत्तर गोंयांत आतां मेरेन केंद्रीय मंत्री श्रीपाद नायक हांणी सेगीत 5 खेपे (1999 ते 2019 मेरेन) जैत मेळयलां. उत्तर गोंयांत भाजपाचे एकलेच श्रीपाद नायक 5 खेपे खासदार जाला. आतां ते उत्तर गोंयांत सेगीत सवी खेपे वेंचणुक लडयतात. काँग्रेस आनी मगोचे मात वेगवेगळे फुडारी खासदार जाल्या.
दक्षीण गोंयांत काँग्रेसीचे एदूआर्द फालेरो हांणी सगळ्यात चड 5 खेपे लोकसभा वेंचणुक जिखल्या. तरी तांचो खासदारकीचो कार्यकाळ श्रीपाद नायक हांचे परस उणो आसा. एदूआर्द फालेरो हांचे उपरांत काँग्रेसीचे फ्रान्सिस सार्दीन हांणी 4 खेपे वेंचणुक जिखल्या. उत्तर गोयांत भाजपाचे एकलेच श्रीपाद नायक हे 5 खेपे खासदार जाल्या. दक्षीण गोंयांत भाजपाचे रमाकांत आंगले (1999) आनी नरेंद्र सावयकार (2014) हे दोगूच जाण खासदार जाल्या.
आता मेरेन राज्यांत मगोचेच सगळ्यांत चड 7 जाण (उत्तर गोंय 6, दक्षीण गोंय 1) खासदार जाल्यात. काँग्रेसीचे उत्तर गोयांत 4 आनी दक्षीण गोयांत 3 मेळोन 7 जाण खासदार जाले.
पक्षा वतीन खासदार जाल्ले फुडारी
महाराष्ट्रवादी गोमंतक पक्ष : उत्तर गोंय – पिटर अल्वारीस (1962), जनार्दन शिंक्रे (1967), अमृत कांसार (1977), संयोगिता राणे (1980), गोपाळराव मयेकार (1989), रमाकांत खलप (1996).
दक्षीण गोंय- मुकुंद शिंक्रे (1962).
कॉंग्रेस : उत्तर गोंय – पुरुशोत्तम काकोडकार (1971), शांताराम नायक (1984), हरिश झांटये (1991), रवी नायक (1998).
दक्षीण गोंय – एदुआर्द फालेरो (1977, 1980, 1984,1989, 1991), फ्रान्सिस सार्दीन (1998, 2007, 2009, 2019), चर्चील आलेमाव (2004).
भाजप : उत्तर गोंय – श्रीपाद नायक (1999, 2004, 2009, 2014, 2019)
दक्षीण गोंय – रमाकांत आंगले (1999), नरेंद्र सावयकार (2014).
युनायटेड गोवन्स : दक्षीण गोंय – इराज्मो सिक्वेरा (1967,1971)
युगोडेपा : दक्षीण गोंय – चर्चील आलेमाव (1996)
चर्चील आलेमांव दक्षीण गोंयांत युगोडेपा (1996) आनी काँग्रेस (2004) या पक्षांचेर जैतिवंत जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
