भांगरभूंय | प्रतिनिधी
मतदानाची तारीख जाहीर जावचे पयलीं केल्लें बुकींग
मडगांव, प्रतिनिधी: रेल्वे प्रशासन दर सप्तकाक वालांकिनी वचपा खातीर भाविकांक विशेश गाडी सोडटा. मंगळारा मतदान आनी सोमारा वालांकिनी वचपी हे गाडये खातीर हेर प्रवाशां सयत गोंयच्या प्रवाशांचीय गर्दी आशिल्ली. मतदानाची तारीख जाहीर जावचे पयलीं बुकींग केल्ल्याचें कांय प्रवाशांनी सांगलें.
राज्यांत लोकसभेच्या वेंचणुकांचो बोवाळ चल्ला. वेंचणूक आयोगा कडल्यान मतदाना खातीर लोकांनी घरा भायर पडचें म्हणून जागृताय करपाचेर भर दिल्या. पत्रकांचें वाटप, जायरात तखटो, वर्तमानपत्रांतल्यान जायराती, पॅराग्लायडींगा वरवीं जागृताय, व्हिडिओ आनी समाजमाध्यमां वरवीं मतदानाचो उलो मारिल्लो. रेल्वे प्रशासनान दर सोमारा वालांकिनी खातीर विशेश रेल्वे सोडटात. ह्या रेल्वेंतल्यान गोंयच्यान वालांकिनी वचपी प्रवाशांनी मतदानाची तारीख जाहीर जावचे पयलींच बुकींग केल्लें. मतदान मंगळारा आशिल्ल्यान तांणी तिकेट रद्द करिनासतना प्रवास करप पसंद केलें.
ही विशेश रेल्वे राज्य सरकार देवदर्शन येवजणेंतल्यान सोडपी रेल्वे गाडी न्हय. मात, अशें आसूनय विरोधकांनी क्रिस्तांव भावांचीं मतां उणी करपाक ही रेल्वे सोडल्या अशी चर्चा आशिल्ली. सोमारा सकाळीं मडगांव रेल्वे स्टेशना वयल्यान वालांकिनीक वचपी रेल्वेंतल्यान गोंयच्या प्रवाशांनी प्रवासा खातीर गर्दी केल्ली. हातूंत दुसर्या राज्यांतलेय कांय प्रवासी आशिल्ले, जांणी गोंयच्यान बुकींग केल्ली. कार्डिनल फिलिप नेरी फेर्रांव हांणीय क्रिस्तांव भावांनी मतदान चुकोवचें न्हय, असो उलो कांय दिसां पयलीं मारिल्लो.
कर्नाटकांत वचपी बसींनी गर्दी
कदंब महामंडळ कर्नाटकांत धाडपी बसींचेरूय प्रवाशांची गिर्दी दिसली. मंगळारा कर्नाटकांतूय लोकसभा वेंचणुकां खातीर मतदान जावपाचें आसा. कर्नाटकांतले खुबशे नागरीक दक्षीण गोंयच्या विवीध वाठारांनी रावतात. मतदान कर्नाटकांत आशिल्ल्यान सोमारा बसस्टॅण्डा वयल्यान कर्नाटकांत वचपी गाडयांनीय गर्दी दिसली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
