भांगरभूंय | प्रतिनिधी
पणजी, बातमीदार ः गोंयांत 6 ते 8 मे मेरेन हवामान ढगाळ उरतलें. उपरांत 9 ते 12 मे ह्या काळांत मात्सो पावस पडटलो असो अदमास हवामान खात्यान उक्तायला. हाचे भायर आयज आनी फाल्यां हवामान उश्ण आनी दमट उरपाची शक्यताय आसा. फुडले सात दीस चडांत चड तापमान 33 ते 35 अंश सेल्सियस मदीं आसतलें असो अदमास खात्यान उक्तायला.
हवामान खात्यान दिल्ले म्हायती प्रमाण राज्यांतल्या फुडल्या पांच दिसांत चडांत चड तापमानांत व्हडलोसो बदल जावपाची शक्यताय ना. पणजीत सोमारा चडांत चड तापमान 33.5 आनी उण्यांत उणें तापमान 27 डिग्री सेल्सियस नोंद जालां. जाल्यार मुरगांवांत चडांत चड तापमान 33.6 अंश आनी उण्यांत उणें 27.4 अंश नोंद जालां.
आयज पणजेंत संबंदीत ओलसाण 77 टक्के आनी मुरगांवांत 84 टक्के आशिल्ली. फुडल्या सात दिसां खातीर संबंदीत दमटसाणेंत व्हडलोसो बदल जावपाची शक्यताय ना अशें खात्यान स्पश्ट केलां. संबंदीत दमटसाण 80 ते 90 टक्क्यां मदीं आसपाची शक्यताय आसा.
ह्या सात दिसांत उश्णताय निर्देशांक म्हळ्यार जाणवपी तापमान 40 अंश सेल्सियस सकयल उरपाची शक्यताय खात्यान उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
