भांगरभूंय | प्रतिनिधी
एशियाडा खातीर खेळगड्यांची वळेरी जाहीर, कात्याचें नांव ना
पणजी, प्रतिनिधी : भारताचें पयल्या क्रमांकाचें सेलर (व्हड्याचेर उबें रावन तें वारें, ल्हाराचे चलोवप) कात्या कुएल्हो हाच्या करियराक व्हडलो धपको बसला. तातूंत ताची कांयच चूक ना. पयर चीनांत जावपी आशियायी सर्ती खातीर ६३४ खेळगड्यांच्या पंगडाची वळेरी युवा आनी खेळां मंत्रालयान जाहीर केल्यात. तातूंत कात्याचें नांव ना. विशेश म्हणल्यार फेब्रुवारींत जाल्ले शर्यतींत ताची सर्ती खातीर निवड जाल्ली. आशियायी सर्ती खातीर पात्र थारपी तें पयलें भारतीय खेळगडें आशिल्लें. हे वळेरेंतल्यान २०० खेळगड्यांक कुशीक काडल्यात. धपको दिवपी गजाल म्हणल्यार तातूंत आशियायी सर्ती खातीर पात्र थारिल्ले खेळगडे आसात. म्हणल्यार धावी पास, पूण अकरावे प्रवेश घेवपाक बंदी!!
कात्या म्हणटा, २५ ऑगस्टाक ताचें नांव वळेरेंत आशिल्लें. गणभेसा खातीर ताचें टेलरान ताच्या कपड्याचें जाॅक पसून घेतिल्लें. मागीर अचकीत कितें जालें तें कळना. १६ जाणांचो सेलिंग पंगड आसा. तातूंतल्यान म्हाका एकल्याकूच भायर मारलां. म्हाका खूब निर्शेणी आयल्या. ह्या खेळा खातीर खूब पयसो लागता. आवय- बापायच्या मेहनतीच्या पयशांतल्यान हांवें वर्सांची वर्सां खूब मेहनत केल्या…. आतां सगलें उदकांत गेलां. ही म्हजी दुसरी आशियायी सर्त आसपाची. आतां खर्च केल्लो वेळ मेळचो ना. पात्र थारिल्लें आसतना म्हाका भायर मारलें. म्हाका हाचे फाटलें कारण कळ्ळ्यार बरें जातलें.
मंत्री गोविंद गावडे हांणी कात्या आपणाक मेळिल्ल्याचें सांगलें. हांवें सोमतेंच खेळां, युवा वेव्हार खात्याच्या सचिवाक पत्र धाडलां. भारतीय ऑलिंपिक असोसिएशनाकूय पत्र धाडलां. ताका कित्याक लागून भायर मारलां, तें म्हाका खबर ना, अशेंय ताणें सागंलें. गोवा याॅटिंग असोसिएशनाकूय ताका कित्याक भायर मारलां तें खबर ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
