पर्वरे अपघातांत भयण, भावोजी, मेवण्यांक मरण
भांगरभूंय | प्रतिनिधी
दोगी जखमी, रक्षाबंधन करून येतना काळाचो घालो
पणजी, प्रतिनिधी : पर्वरे टीव्हीएस शोरुमा कडेन शेनवारा रातीं भिरांकूळ अपघात जालो. तातूंत तिगांक मरण आयलें जाल्यार दोगी चलयो जखमी जाल्यात. ह्या अपघातांत शॉन फर्नांडीस (25, पर्रा), आबेगल डिसोझा (21, मेरशी), वाल्ड्रफ डिसोझा (25, हणजुणें) हांकां मरण आयलें. तशेंच फियोना डिसोझा (25) निनोश्का फर्नांडीस (21) गंभीर जखमी जाल्यांत. आबेगल ही शाॅनाची भयण आनी वाल्ड्रफ हो भावोजी. तीं मेरशेच्यान रातीं रक्षाबंधन करून वतना ही दुर्घटना जाली, अशें पुलिसांनी सांगलें.
काल रातीं टाटा नॅक्सॉन ही इलेक्ट्रीक गाडी पणजेच्यान म्हापश्यां वताली. गाडी बरीच वेगान आशिल्ली. अचकीत गाडयेच्या चालकाचें नियंत्रण गेल्ल्यान गाडी रस्त्या कुशीच्या एका झाडाचेर मारली. हातूंत गाडयेंतल्या आबेगल, वाल्ड्रोफ आनी शॉन फर्नांडीस हांकां मरण आयलें. गाडयेंत आशिल्ल्यो हेर दोन चलयो गंभीर जखमी जाल्यो. तांचेर सध्या बांबोळे गोमेकॉ हॉस्पिटलांत उपचार चालू आसा. कांय जाणांच्या मतान मदीं कोण तरी आयिल्ल्यान वाहनचालकाचो गाडये वयलो ताबो गेल्लो.
मजगतीं, विरोधी पक्ष फुडारी युरी आलेमांव हांणी राज्यांत वाडिल्ल्या अपघाता विशीं हुस्को उक्तायला. कायदो चालीक लावपी अधिकाऱ्यांचें कायदो माड्डुपी लोकांचेर, खास करून रातच्या वेळार वेगान गाडयो चलोवप्यांचेर नियंत्रण नाशिल्ल्याचें दिसता. काळ्या आरशाचे गाडयेंतल्यान मडें आंबोली व्हरता आनी ताची म्हायती पुलिसांक नासता, हाका कितें म्हणचें? मुख्यमंत्री डॉ. प्रमोद सावंत आतां तरी जबाबदारी निश्चित करतले काय दोश- आरोपांचो खेळ चालूच दवरतले, असो प्रस्न आलेमांव हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
