भांगरभूंय | प्रतिनिधी
कूड व्हरून आंबोली घांटार पुरली
म्हापशें, प्रतिनिधी : पर्वरेची कामाक्षी (३०) ही चली फाटल्या दोन दिसां सावन बेपत्ता आसली. तिच्या भावान पुलिशेंत ती बेपत्ता आशिल्ल्याची कागाळ केल्ली. तिचो खून करून कूड आंबोली उडयिल्ल्याचें उक्ताडार आयलां. तिचो इश्ट प्रकाश चुंचवाड (२२) हाणें हो खून केल्ल्याचें कबूल केलां. ताका घेवन पुलीस आंबोली गेल्ले.
कामाक्षी आनी प्रकाश हांचे मदीं इश्टागत आशिल्ली. ती तशीच चालू दवरची म्हणून प्रकाशान कामाक्षीक सतावपाक सुरवात केली. प्रकाशाच्या त्रासांक कंटाळून तिणें म्हापशें पुलिशेंत ताची कागाळ केल्ली. पुलिसांनी प्रकाशाक आपोवन ताका समजावन घरा धाडिल्लो. पूण दोन दिसां उपरांत ही तरणाटी बेपत्ता जाली. हे विशीं तिच्या कुटुंबियांनी रोखडेंच पुलिसांक कळयलें. तेन्ना तिचें मोबायल लोकेशन सिंधुदुर्ग जिल्ह्यांतल्या आंबोली घांटांत मेळ्ळें. ताका लागून दुबावीताक घेवन पुलीस आंबोली घांटार फुडले चवकशे खातीर गेल्यात.
प्रकाशाची पर्वरे गॅरेज आसा. प्रकाश आनी कामाक्षी मदीं घट्ट इश्टागत आशिल्ली. पूण तांचें मदीं सेगीत झगडें पेटिल्ल्यान कामाक्षीन ही इश्टागत तोडपाचें थारायलें. पूण प्रकाशाक हें मानवलें ना. ताणें तिका सतावपाक सुरवात केली. २९ ऑगस्टाक प्रकाशाक समजावपाक कामाक्षीन म्हापश्यां आपयिल्लो. थंय तांचे मदीं झगडें पेटलें. तेन्ना कामाक्षी सयत तिची एक इश्टीण आनी इश्ट आशिल्लो. प्रकाशान कामाक्षीचेर थापट फुलयलें. उपरांत त्या तिगांयनी मेळून प्रकाशाचो आयफोन फोडलो. मागीर कामाक्षीन प्रकाशा आडा म्हापशें पुलीस स्टेशनाचेर कागाळ केली. उपरांत पुलिसांनी दोगांयकूय आपोवन खरपणान समजायलें. त्या दिसा सावन कामाक्षी बेपत्ता आशिल्ली.
ती नाशिल्ल्याचें कळटांच कामाक्षीच्या भावान ३० ऑगस्टाक पर्वरी पुलीस स्टेशनांत बेपत्ता जाल्ल्याची कागाळ दाखल केली. बिरेस्तारा रातचो पुलिसांनी प्रकाशाक चवकशे खातीर ताब्यांत घेतलो.
मजगतीं, प्रकाश हांणी आपलो गुन्यांव कबूल केला. तांणी ‘कामाक्षीन आपल्याक सोडून तें आनी कोणाचेर मोग करतालें. ताका लागून आपणें कामाक्षीचो खून करून तिची कूड आंबोली घांटार व्हरून पुरल्या.’ अशें ताणें सांगिल्ल्याचें पुलिसांनी ह्या प्रतिनिधीक सांगलें.
कामाक्षीची कूड आंबोली घाटार मेळ्ळ्या. पलिसांनी पंचनामो करपाक सुरवात केल्या. हे संबंदी पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
