भांगरभूंय | प्रतिनिधी
स्वप्नील पेडणेंकार मारपेट प्रकरण
म्हापशें: हळदोण्यां आदले दुस्मानकायेंतल्यान स्वप्नील पेडणेंकार ह्या तरणाट्याक मारपेट करपा सयत पिस्तूल जोखून जिवेशी मारपाची धमकी दिल्ल्या प्रकरणांत पंच वांगडी दुबावीत प्रणेश नायक हाचो अटकपूर्व जामीन अर्ज म्हापशेंच्या अतिरिक्त जिल्हो आनी सत्र न्यायालयान भायरायलो. तशेंच तत्काळ म्हापशें पुलिसांक शरण येवचें आनी चवकशेक सहकार्य करचें अशें निर्देश दिल्यात.
बिरेस्तारा 31 वेर म्हापशेंच्या अतिरिक्त जिल्हो सत्र न्यायालयांत दुबावीत प्रणेश नायक हाच्या अटकपूर्व जामीन अर्जाचेर सुनावणी जाली. ह्या वेळार दुबाविता वतीन अॅड. जगदीश तोरसकार, सरकारी वकी अॅड. राल्स्टन बार्रेटो आनी हस्तक्षेप वकील म्हूण अॅड. विनायक पोरोब हांणी न्यायालयांत युक्तिवाद केलो. युक्तिवादा उपरांत न्यायाधीश बॉस्को रॉबर्ट हांणी दुबाविताचो जामीन अर्ज भायरायलो आनी तत्काळ पुलिसांक शरण येवपा सयत तपासकामांत सहकार्य करपाचो आदेश दिलो.
मजगतीं, ही घडणूक मंगळारा 1 ऑगस्ट दिसा मध्यानरातीं घडिल्ली. दुबावीत आरोपी प्रणेश नायक हाणें कागाळदार स्वप्नील पेडणेंकार (हळदोणें) हाका हळदोण्यां एके सुवातेर आपयलो. उपरांत दुबावितान ताका जाप विचारून ताचेच मोटारींत ताका घालून गाळी संवल्यो आनी मारपेट करून गंभीर परिणामाची धमकी दिली. तशेंच आदले दुस्मानकायेंतल्यान आनी सोऱ्याचे घुंवळेंत दुबावीत प्रणेश नायक हाणें कागाळदाराचेर पिस्तूल जोखलें आनी कुटुंबा सयत जिवेशी मारून पुला सकयल न्हंयेंत उडोवपाची धमकी दिल्ली.
पुलिसांनी ह्या प्रकरणांत भा.दं.सं.च्या 342, 323, 506(2) आनी 34 आनी उपरांत पिस्तूल प्रतिबंधक कायदो कलम 3, 4 25 आनी 27 कलमा खाला गुन्यांव नोंद केल्लो.
ह्या गुन्यांवा खाला पुलिसांनी दुबावीत दाकशेष कुरपे (22, पुणें), विकी करंदे (22, पुणें) आनी सुरज यादव (22, पुणें) हांकां अटक केल्ली. तिगूय दुबावीत प्रणेश नायक हाच्या रॅस्टोरंण्टांत काम करताले. वयल्या दुबावितांची जिल्हो सत्र न्यायालयान जामिनार सुटका केल्या. हे घडणुके सावन दुबावीत प्रणेश नायक फरार आशिल्लो आनी अटक चुकोवपा खातीर ताणें न्यायालयांत धांव घेतिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
