भांगरभूंय | प्रतिनिधी
मडगांव, प्रतिनिधी: फाटल्या सप्तकांत नावेलीच्या वेस्टर्न बायपास लागसारच्या जंक्शनाचेर जाल्ल्या अपघातांत एक बायल जखमी जाली. हाचे उपरांत सिग्नल बंद आशिल्ल्यान अपघात घडटा हें स्पश्ट जालें. बुधवारा आमदार तुयेकार हांणी स्पश्ट केलें की आठ दिसांनी सिग्नल सुरू जातलो, सुचोवणी फलक लायतले. हाचे उपरांत नावेलीच्या नागरिकांनी आठ दिसां भितर सिग्नल सुरू करूंक ना जाल्यार रास्तो रोकोची शिटकावणी दिल्या.
नावेलीच्या वेस्टर्न बायपासाच्या जंक्शनाचेर जाल्ल्या अपघातांक पळोवन आमदार उल्हास तुयेकारान बुधवारा पळोवणी केली. जंक्शना वयलो सिग्नल चालु नाशिल्ल्यान ह्या जाग्यार अपघात वाडल्यात अशें तांणी सांगलें. बांदकाम खात्या कडेन हे विशीं चर्चा केली तेन्ना सिग्नला खातीर लायिल्ली बॅटरी आनी इन्वर्टर कोणे तरी चोरून व्हेला अशें सांगलें. सिग्नल सुरू जाय मेरेन येरादारी पुलीस थंय दवरतले. हाचे भायर वाहनांक सुचोवण्यो मेळपा खातीर फलक लावपाक सांगलां.
आठ दिसांनी सिग्नल सुरू जातले अशें आमदार तुयेकारान उतर दिलां. पंचायतीनय हे खातीर यत्न करचो, पंचायतीन आपल्या निधीचो उपेग करून सिग्नल दुरुस्त करचे. आठ दिसांनी सिग्नल सुरू जालो ना जाल्यार शेंकड्यांनी लोक हांगा येवन रस्तो आडायतले अशी शिटकावणी प्रतिमा कुतिन्हो हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
