भांगरभूंय | प्रतिनिधी
विश्जीत राणे: कोलकाता प्रकरणाचो केलो निशेध
मुख्यमंत्रीपदार एक बायलमनीस आसतनाय अस्तंत बंगालांतल्या कोलकाता शारांत बायल दोतोरा विशीं जें घडलें तें भिरांकूळ आसा. गोंयांत अशे तरेच्यो घडणुको घडच्यो न्हय, हे खातीर गोंय वैजकी कायद्यांत दुरुस्ती करतले. सरकारी आनी खाजगी हॉस्पिटलांतल्या दोतोरांक पुरायपणान संरक्षण दितले अशें भलायकी मंत्री विश्वजीत राणे हांणी आयतारा पत्रकारां कडेन उलयतना स्पश्ट केलें.
फाटलीं खूबशीं वर्सां आपूण गोंयचो भलायकी मंत्री म्हूण काम करतां. भलायकी मंत्री ह्या नात्यान आपणें सदांच दोतोरांक तेंको दिला. लोक दोतोरांक देव मानतात. ताका लागून दोतोरांची सुरक्षा म्हत्वाची आसा. ते खातीर आपूण कार्यरत आसा. कोलकाता प्रकरणांत बळी गेल्ल्या बायल दोतोराक न्याय मेळोवन दिवपा खातीर गोंयचे दोतोर रस्त्यार देंवले. तांणी सरकारा कडेन ज्यो मागण्यो केल्यात त्यो सगल्यो मागण्यो पुराय जातल्यो अशी हमी मंत्री राणे हांणी दिली.
अस्तंत बंगालच्यो मुख्यमंत्री एक बायलमनीस आसून लेगीत तांकां थंयच्या बायलांचे सुरक्षेची काळजी ना ही दुदैवी गजाल. लोकांचो जीव वाटावपी दोतोरांक सगले तरेची सुरक्षा दिवप हें राज्य सरकाराचें कर्तव्य आसा. भलायकी मंत्री ह्या नात्यान गोंयच्या सरकारी आनी खाजगी हॉस्पिटलांनी कार्यरत आशिल्ल्या दोतोरांक सगले तरेची सुरक्षा दिवपाचें कर्तव्य आपले आसून तातूंत आपूण फाटीं सरचो ना अशी गवाय तांणी दिली.
कोलकाता प्रकरणाचे चवकशेक गती दिवन ह्या प्रकरणांतल्या आरोपींचेर खर कारवाय जावप गरजेची आशिल्ल्याचें तांणी स्पश्ट केलें.
हॉस्पिटलांनी सीसीटीव्ही बसयतले
सगल्या सरकारी हॉस्पिटलांनी सीसीटीव्ही कॅमेरे बसयतले. खूबशे कडेन सीसीटीव्ही कॅमेरे आसात. पूण जंय कॅमेरे नात थंय बसोवपाची वेवस्था रोखडीच करतले. कोलकातांत निर्माण जाल्ले परिस्थितीक लागून सगले कडेन सतर्कताय निर्माण जाल्या. दोतोराचेर अशे तरेचो अत्याचार समाजांत विखारी कृत्य पचोवपाचो यत्न केन्नाच सहन करचे नात. ममता बॅनर्जी हांणी राजिनामो दिवचो. बायलांच्या सक्षमीकरणाचेर उलोवपी बॅनर्जी आनी ह्या संदर्भांत जाल्लो प्रकार हाची जबाबदारी घेवची अशें भलायकी मंत्री विश्वजीत राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
