भांगरभूंय | प्रतिनिधी
भलायकी बरी दवरपाची आसल्यार दर दिसा दूद पियेवचें. दुदांत कॅल्शीयम, प्रथिनां, ए, के, डी आनी आय जिवनसत्वां, फॉस्फरस, मॅग्नेशियम आनी आयोडीन अशीं जायतीं पोश्टीक तत्वां आसतात. हाका लागून दुदाकूय पुराय अन्न मानतात. हाडां घट करपाक तशेंच स्नायूंची उदरगत करपाक दुदाक खूब म्हत्व आसा. पूण दूद पियेवपाचो योग्य वेळ तुमकां खबर आसा? भलायकी तज्ञांच्या मतान चुकीच्या वेळार दूद पिल्यार भलायके संबंदीत जायत्यो समस्या निर्माण जावंक शकतात. तुमीय ह्या गोंदळांत आसात जाल्यार दूद पियेवपाचो योग्य वेळ जाणून घेयात.
जेवले उपरांत रोखडेंच दूद पिवचें न्हय अशें भलायकी तज्ञ म्हणटात. तशेंच दूद पियेवचे पयलीं आंबट वा फळां, धंय, खारट जेवण खावप टाळचें. अशें केल्यार भलायकेक लुकसाण जावं येता. भलायकी तज्ञांच्या मतान जेवणा उपरांत ४० मिनटां उपरांत दूद पियेवप भलायके खातीर फायद्याचें मानतात.
हुळहुळीत दूद पियेवप भलायके खातीर फायद्याचें. तज्ञांच्या म्हणण्या प्रमाण जाण्ट्यांनी न्हिदेच्या एक वरा पयलीं दूद पियेवचें. हाका लागून पचन तंत्राचेरूय भार पडना. असलें दूद पिल्यार दुयेंसांचो धोको नासता. तशेंच बरी न्हीद पडटा.
रिकाम्या पोटान दूद पियेवप टाळचें. कांयच खायनासतना दूद पिल्यार ऍसिडीटी जावं येता. पचनांत त्रास जावपी लोकांनी कितेंय खाल्या उपरांतूच दूद पियेवपाचो सल्लो तज्ञांनी दिला. पूण भुरग्यांक तशें केल्यार तें माल पडचें ना. तांकां केन्नाय दूद पियेवंक मेळटा आनी अशें केल्यार तांकां उर्जा मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
