भांगरभूंय | प्रतिनिधी
पणजी ः ताळगांव पंचायतीन कामराभाट-ताळगांवांत आशिल्ल्या धोक्याच्यो तीन इमारतींतले 72 फ्लॅट मोडपाचो निर्णय घेतला. तशेंच ते कित्याक मोडचे न्हय हाचेर सात दिसां भितर मत सादर करपाची कुटुंबांक पंचायतीन नोटीस जारी केल्या.
ताळगांव पंचायतीन कामराभाटांतल्या तीन इमारतींतले 72 फ्लॅट मोडपाचो निर्णय घेतला, तिनूय इमारती 58 वर्सां पोरण्यो आसात. पणजी पालिका म्हामंडळान पॉलिटेक्निक म्हाविद्यालयाच्या सहकार्यान 14 जून 2022 दिसा ह्या इमारतींची तपासणी केल्ली. उपरांत पॉलिटेक्निक म्हाविद्यालयान सादर केल्ल्या अहवालांत संबंदीत तीन इमारती रावपा खातीर असुरक्षित आसात अशें सांगले. ह्या इमारतींचो आरसीसी कोसळपाचे स्थितीत आसा आनी तो कोसळ्ळो जाल्यार मनशाच्या जिविताक हानी जावंक शकता.
ह्या इमारतींच्या मालकांनी जायतीं वर्सां इमारतींचे देखरेखी कडेन दुर्लक्ष केलें. देखून आरसीसी बांदकाम पुरायपणान दुबळें जालां. देखून तिनूय इमारती मोडप योग्य आसा अशेंय अहवालांत म्हणलां. ह्या इमारतींतल्यान कसलोच धोको जावचो न्हय हे खातीर पणजी पालिका म्हामंडळान ताळगांव पंचायतीक गोंय पंचायत राज कायदो, 1994 प्रमाण ह्यो तीन इमारती मोडून उडोवपाची सुचोवणी दिल्या असोय उल्लेख नोटीसांत केला.
मजगतीं गोंय पंचायत राज कायदो, 1994 आनी ताळगांव पंचायतीन संमत केल्ल्या थारावा प्रमाण ह्यो तीन इमारती 72 फ्लॅटां सयत मोडटले. देखून ह्या कुटुंबांनी सात दिसां भितर आपले विचार पंचायती मुखार मांडचे असो उलो पंचायतीन मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
